रोजगारी सृजनामा बजेट केन्द्रित गर्न उद्योग परिसंघको सुझाव
<p>काठमाडौं। नेपाल उद्योग परिसंघले अर्थमन्त्री डा. युवराज खतिवडालाई भेटेर आगामी बजेटमा समेट्नुपर्ने क्षेत्रका विषयमा सुझाव दिएको छ।</p>
<p>परिसंघले रोजगारी सृजना, निजी क्षेत्रको विकास र कृषिसहित साना तथा मझौला उद्योगको विकासमा बजेट केन्द्रित गर्न सुझाएको हो।</p>
<p>सुझावमा विस्तारकारी वित्तीय नीतिसहितको बजेट ल्याउन र पूँजीगत खर्चलाई बढाई समयमा खर्च गर्ने व्यवस्था गर्न आग्रह गरिएको छ।</p>
<p>रोजगारी सृजनाका लागि व्यावसायिक कृषिमा लगानी आकर्षित गर्न १० वर्षसम्म आयकर छुट दिने व्यवस्था मिलाउनुपर्ने परिसंघको सुझाव छ।</p>
<p>सबैखाले (साना तथा घरेलु, मझौला र ठूला) उद्योगको विकासमा लगानी जुटाउन ग्यारेन्टी कोष खडा गर्न पनि परिसंघले आग्रह गरेको छ।</p>
<p>उत्पादनमूलक उद्योगका लागि आवश्यक लगानीका लागि ऋणको लागतलाई आगामी तीन वर्षका लागि कम्तिमा पाँच प्रतिशतले कम गर्न परिसंघले आग्रह गरेको छ।</p>
<p>यस्तै, बजार तरलता थप गर्न भ्याट तथा अन्य कर फिर्तालगायत सरकारले भुक्तान गर्नुपर्ने सम्पूर्ण रकम तत्काल भुक्तान गर्ने व्यवस्था मिलाइनुपर्ने सुझावपत्रमा उल्लेख छ।</p>
<p>चालू आर्थिक वर्षमा घाटामा रहेका उद्योगलाई बढीमा पाँच प्रतिशत पुनर्कर्जाको व्यवस्था गर्नसमेत आग्रह गरिएको छ। त्यसका लागि छुट्टै एक खर्ब रुपैयाँको पुनर्कर्जा कोष निर्माण गर्न भनिएको छ।</p>
प्रतिक्रिया दिनुहोस्
.jpg)
