स्वदेशी कृषि उत्पादन र व्यवसाय प्रवर्द्धन गर्न स्थानीय तहहरूलाई निर्देशन
<p><strong>काठमाडौं।</strong> संघीय मामिला तथा सामान्य प्रशासन मन्त्रालयले स्वदेशी कृषि उत्पादन उपभोग प्रवर्द्धन गर्न सबै स्थानीय तहलाई निर्देशन दिएको छ।</p>
<p>मन्त्रालयले आज ७५३ वटै स्थानीय तहलाई परिपत्र गरी उक्त निर्देशन दिएको हो। स्वदेशी कृषि उत्पादन उपभोग प्रवर्द्धन गर्ने सम्बन्धमा कृषि तथा पशुपन्छी मन्त्रालयबाट प्राप्त पत्रका आधारमा स्थानीय तहहरूलाई परिपत्र गरिएको संघीय मामिला मन्त्रालयले जनाएको छ। </p>
<p>कृषि मन्त्रालयको पत्रमा स्थानीय तहहरूले सञ्चालन व्यवस्थापन गरेका क्‍वारेन्टिनस्थल र कोभिड-१९ को राहात वितरणमा आन्तरिक रूपमा उत्पादित कृषि उपज, तरकारी, फलफूल, दूध, दूग्ध पदार्थ, माछा, मासुलगायत प्रयोग गर्ने व्यवस्था मिलाउन आग्रह गरिएको छ। कोभिड-१९ का कारण आर्थिक विकासको महत्त्वपूर्ण क्षेत्रको रूपमा रहेको कृषिलाई दूरगामी असर पर्न सक्ने भन्दै मन्त्रालयले उक्त निर्देशन जारी गरेको हो।</p>
<blockquote>
<p><strong>मन्त्रालयले स्वदेशी उत्पादन र व्यवसायको संरक्षण एवं प्रवर्द्धन गर्ने कार्यमा सहयोग गरी कृषकहरूको हौसला बढाउन सबै स्थानीय तहलाई निर्देशन दिएको छ।</strong></p>
</blockquote>
<p>‘‘कोभिड-१९ को विश्वव्यापी महामारीको त्रास एवं बन्दाबन्दीको कारण स्वदेशमा उत्पादित कृषि उपजहरू तरकारी, फलफूल, दूध, दुग्ध पदार्थ, माछा, मासु र अण्डाको खपत कम हुँदा समग्र मूल्य श‍ृंखलामा मन्दी आई यी व्यवसायहरूमा प्रत्यक्ष प्रभाव परी व्यवसायबाट पलायनसमेत हुन सक्ने अवस्था रहेको छ,’’ कृषि मन्त्रालयको पत्रमा उल्लेख छ।</p>
<p>मन्त्रालयले स्वदेशी उत्पादन र व्यवसायको संरक्षण एवं प्रवर्द्धन गर्ने कार्यमा सहयोग गरी कृषकहरूको हौसला बढाउन सबै स्थानीय तहलाई निर्देशन दिएको छ।</p>
<p>‘‘यस असहज परिस्थितिमा स्थानीय तहहरूबाट सञ्चालन व्यवस्थापन भएका र हुने क्वारेन्टाइनस्थल, कोभिड-१९ को राहात वितरण कार्यक्रम, कामका लागि खाद्यान्न कार्यक्रम, गर्भवती महिला तथा बालबालिका पोषण सहयोग कार्यक्रमजस्ता कार्यक्रमहरूमा आन्तरिक रूपमा उत्पादित तरकारी, फलफूल, दूध, दुग्ध पदार्थ, माछा, मासु, अण्डा जस्ता कृषि तथा पशुजन्य उत्पादनहरू समावेश हुने व्यवस्था गर्ने,’’ मन्त्रालयले भनेको छ।</p>
<p>मन्त्रालयले दुग्ध विकास संस्थान र निजी डेरीहरूमा धुलो दूध, मख्खन, घ्यु र चीन मौज्दात रहेकोसमेत जानकारी गराएको छ।</p>
<p><img alt="" src="/uploads/editor/2020-07-01/124710396sanghiya_paripatra.jpg" /></p>
<p><img alt="" src="/uploads/editor/2020-07-01/124556756Krishi_nirdeshan.jpg" /></p>
प्रतिक्रिया दिनुहोस्
.jpg)
