सलहको ठूलो झुण्ड भारतकाे झाँसी आइपुग्यो, नेपाल आउने खतरा टरेको छैन
<p><strong>काठमाडौं।</strong> भारतको राजस्थानबाट उत्तरतर्फ आउँदै गरेको सलहको ठूलो झुण्ड झाँसीसम्म आइपुगेको छ। हावाको गति र दिशामा कुनै परिवर्तन नआए यो झुण्ड नेपालसम्म आइपुग्ने अनुमान यससँग सम्बन्धित विज्ञले गरेका छन्।</p>
<p>“सलहको ठूलो झुण्ड अहिले भारतको झाँसी आइपुगेको छ। यो झुण्ड पूर्वतर्फ आइरहेको छ। हावाको गति र दिशा मोडिएर उत्तरतर्फ वहन थाले यो झुण्ड नेपालसम्म आइपुग्ने देखिन्छ,” कृषि तथा पशुपन्छी विकास मन्त्रालयको प्लान्ट क्वारेन्टाइन तथा विषादी व्यवस्थापन केन्द्रका प्रमुख सहदेवप्रसाद हुमागाईले देखापढीलाई बताए।</p>
<blockquote>
<p><strong>“भारतले पनि सहल नियन्त्रण गर्ने प्रयास गरिरहेको छ। भारतले नियन्त्रण गरे ठूलो झुण्ड आउन सक्दैन। तर, भारतले सकेन भने हामीलाई डर हुन्छ”</strong></p>
</blockquote>
<p>हुमागाईका अनुसार झाँसी आइपुगेको सलहको ठूलो झुण्ड हावा उत्तरतर्फ वहन थाले मध्य र पूर्वी तराईबाट नेपाल प्रवेश गर्नेछ।<br />
<br />
“भारतले पनि सहल नियन्त्रण गर्ने प्रयास गरिरहेको छ। भारतले नियन्त्रण गरे ठूलो झुण्ड आउन सक्दैन। तर, भारतले सकेन भने हामीलाई डर हुन्छ,” हुमागाईले भने।<br />
<br />
शनिबार, आइतबार र सोमबार भारतबाट स-साना सलहको झुण्ड नेपाल प्रवेश गरेको थियो। मंगलबार र बुधबार भने नेपाल छिरेका छैनन्। नेपालभित्र छिरेका सलहका ती झुण्ड अहिले ५३ जिल्लामा फेला परेको हुमागाईले बताए।<br />
<br />
‘‘अहिले हाम्रो ध्यान भारतबाट नेपालतर्फ आउँदै गरेको सलहको ठूलो झुण्डमा छ। दुई-चार दिन त्यो झुण्ड नेपाल आइपुग्दैन,’’ उनले भने। </p>
<p>नेपालभित्र रहेका सलहले अहिलेसम्म ठूलो क्षति नगरेको उनले जानकारी दिए। शुक्रबारबाट मनसुन अझ बढी सक्रिय हुनेहुँदा सलहले ठूलो क्षति गर्ने सम्भावना कम रहेको उनले बताए।</p>
प्रतिक्रिया दिनुहोस्
.jpg)
