सलह कीराको मूल्य तोक्दै प्रदेश र स्थानीय सरकार- कहाँ कति ?
<p><strong>काठमाडौं। </strong>सलह कीरा नेपाल आउने सम्भाव्यता अध्यन गर्न गठन गरिएको प्राविधिक समितिले नेपाल आउँदैन भन्दाभन्दै सलह कीरा नेपाल प्रवेश गरिसकेको छ।</p>
<p>सलह नेपाल प्रवेश गर्दासम्म कृषि तथा पशुपन्छी विकास मन्त्रालयले व्यवस्थापन र नियन्त्रणको पूर्वतयारी गरेको थिएन। तर, सलह नेपाल प्रवेश गर्न शुरू गर्दासम्म सलह नियन्त्रण तथा व्यवस्थापनको तयारी गर्न ढिला भइसकेको थियो।</p>
<p>यसैबीचमा सलह नियन्त्रणको कुनै विकल्प नभएपछि प्रदेश र स्थानीय सरकारले सलह नियन्त्रण गर्ने नयाँ योजना सर्वाजनिक गरेका छन्।</p>
<p>विभिन्न प्रदेश र स्थानीय सरकारले सलह कीरा समातेर ल्याउनेसँग पैसा तिरेरै खरिद गर्ने निर्णय सार्वजनिक गर्दै आएका छन्।</p>
<p>अहिलेसम्म प्रदेश र स्थानीय गरी ६ वटा सरकारले कृषकसँग सलह किन्ने घोषणा गरिसकेका छन्। जसमा, सबैभन्दा सस्तो प्रदेश ५ सरकारले तोकेको छ। प्रदेश सरकारको अस्थायी राजधानी बुटवले सलह समातेर ल्याउनेलाई प्रतिकिलो २० रूपैयाँ दिन्छ।</p>
<p>बुटवल उपमहानगरपालिकाले १४ गते नै कृषकसँग सलह खरिद गर्ने निर्णय गरेको थियो। जबकि, नेपालमा सलह प्रवेश गरेको पुष्टि १३ असारमा भएको थियो।</p>
<blockquote>
<p><strong>स्याङ्जाको कालिगण्डकी गाउँपालिकाका अध्यक्ष खिमबहादुर थापाले कृषकलाई प्रोत्साहन गर्न सलहको किन्ने घोषणा गरेको बताए। तर, गाउँपालिकामा अहिलेसम्म कसैले पनि सलह बेच्न ल्याएका छैनन्।</strong></p>
</blockquote>
<p>नेपालमा बुटवल उपमहानगरले पहिलोपटक सलहको मूल्य तोकेपछि अन्य प्रदेश तथा स्थानीय सरकारले पनि सलहको मूल्य तोक्न शुरू गरेका हुन्। </p>
<p>सुदूरपश्चिम प्रदेशले १४ असारमा, स्याङ्जाको कालिगण्डकी गाउँपालिकाले १५ असारमा सलहको मूल्य तोकेका थिए। यसका साथै, बागमती प्रदेश र कृषि विज्ञ मदन राईले १६ असारमा सलह किन्ने भन्दै त्यसको मूल्य तोकेका थिए।</p>
<p>स्याङ्जाको कालिगण्डकी गाउँपालिकाका अध्यक्ष खिमबहादुर थापाले कृषकलाई प्रोत्साहन गर्न सलहको किन्ने घोषणा गरेको बताए। तर, गाउँपालिकामा अहिलेसम्म कसैले पनि सलह बेच्न ल्याएका छैनन्।</p>
<p>यस्तै, मकवानपुरको बकैया गाउँपालिकाको वडा नम्बर ७ ले पनि सलह समात्नेसँग सलह किन्ने घोषणा गरेको थियो। वडा अध्यक्ष रामकाजी लामिछानेले सलहबाट वडामा कुनै पनि क्षति नहोस्र र समात्ने कृषकलाई सम्मान गर्ने लक्ष्यसहित मूल्य तोकेको <em>देखापढी</em>लाई जानकारी दिए।</p>
<p>यससँगै काठमाडौं उपत्यकाको नगरपालिका टोखाले पनि सलहको मूल्य तोकेको छ।</p>
<p>टोखाले प्रतिकेजी ५० रूपैयाँमा सलह किन्ने घोषणा गरेको नगरप्रमुख प्रकाश दाहालले बताए।</p>
प्रतिक्रिया दिनुहोस्
.jpg)
