नेपालमा व्यावसायिक एमआरओ सेवा सञ्चालनको तयारी
<p>काठमाडौं। वायुयान परीक्षण तथा वायुयानका पार्टपुर्जा मर्मत सम्भार (एमआरओ) नेपालमा व्यावसायिकरूपमा सञ्चालनका लागि पहल थालिएको छ। वायुयानको परीक्षण तथा पार्टपुर्जा मर्मत सम्भारलाई आकर्षक व्यवसायको रूपमा लिइन्छ।</p>
<p>वायुयान मर्मतसम्भारका निम्ति विदेशिने करोडौँ पुँजीको स्वदेशमै उपयोग गरी उड्डयन क्षेत्रलाई प्रोत्साहन गर्ने गरी सरकारले एमआरओ संस्था स्थापनाका लागि पहल थालेको हो।</p>
<p>सार्वजनिक निजी साझेदारी (पब्लिक प्राइभेट पार्टनरसिप) मोडलमा एमआरओ संस्था सञ्चालनका लागि संस्कृति, पर्यटन तथा नागरिक उड्डयन मन्त्रालयले सरोकारवालासँग छलफल गरेको छ।</p>
<p>पर्यटनमन्त्री योगेशकुमार भट्टराईसहित मन्त्रालयका उच्च अधिकारी तथा वायुयान सञ्चालक एवं विज्ञहरूसँग आज मन्त्रालयमा भएको छलफलमा एमआरओसम्बन्धी संस्था स्थापनाको अवधारणा, मोडालिटी, लगानी आदिबारे छलफल भएको हो।</p>
<p>त्यसका निम्ति मन्त्रालयले एक कमिटी गठन गरी एमआरओ स्थापनाको प्रक्रिया अघि बढाइने जनाइएको छ।</p>
<p>उड्डयनको क्षेत्रमा राम्रो आर्थिक आम्दानी हुने क्षेत्रमा एमआरओ पर्छ। नेपाली वायु सेवा कम्पनीले यही कामका लागि विदेशमा वार्षिक करोडौं खर्चनु परेको छ।</p>
<p>नेपाल वायु सेवा निगम (नेपाल एअरलाइन्स)ले मात्रै वार्षिक चार लाख अमेरिकी डलरभन्दा बढी एमआरओका लागि खर्च गर्ने गरेको छ।</p>
<p>निजी क्षेत्रका वायुसेवा कम्पनीले वार्षिक १५ देखि २० लाख डलर खर्च गर्ने गरेको बताइन्छ।</p>
<p>त्यसो त ६ वर्षअघि अर्थात २०७० मा पर्यटन मन्त्रालयले एमआरओसम्बन्धी संस्था स्थापनाका लागि एक अध्ययन कमिटी गठन गरेको थियो।</p>
<p>पर्यटन मन्त्रालयका सहसचिव सरेश आचार्यको संयोजकत्वमा गठित उक्त समितिले आफ्नो प्रतिवेदन मन्त्रालयलाई बुझाएको भए पनि प्रतिवेदन दराजमै थन्किएको थियो।</p>
प्रतिक्रिया दिनुहोस्
.jpg)
