Economics, Business and Entrepreneurship

गृहपृष्ठ

चियामा फेरि विवाद : उद्योगीको छवि गिराएको आरोप इलाम। ‘सदावाहर’जस्तो चलिरहने चिया विवाद फेरि बल्झिएको छ। केही महिनाअघि मात्र शुरु भएको किसान-उद्योगी विवाद साम्य हुन नपाउँदै यहाँस्थित सूर्योदय नगरपालिकामा अर्को विवाद चर्केको छ। केही दिनअघि नगर प्रमुख रणबहादुर राई, उपप्रमुख दुर्गादेवी भट्टराई, नगरपालिकाको चिया शाखा सचिवालय संयोजक देवेन्द्र शर्मा, चिया तथा कफी बोर्डका प्रमुखसहितको टाली उद्योगमा पुगेर अनुगमन गरेपछि विवाद बाहिरिएको हो। नगरपालिकाले बनाएको दुई वर्षअघिको चिया मापदण्ड कार्यान्वयन भए/नभएको बुझ्न उद्योग गएको अनुगमन टोलीले आफूहरूको आँच आउने काम गरेको भन्दै उद्योगीले आपत्ति जनाएका छन्। नगरपालिकाको कार्यविधिमा किसानको हरियो चियापत्तीको मूल्य प्रतिकिलो ४० रुपैयाँ न्यूनतम दिनुपर्ने प्रावधान कार्यान्वयनमा आए/नआएको जानकारी लिन अनुगमन गरिएको थियो तर, न्यूनतम मापदण्ड पूरा नभएको भन्दै नगरपालिकाले सामाजिक सञ्जालमा पोष्ट गरेपछि उद्योगीले आफूहरूको इज्जतमाथि आँच आउने काम गरेको भन्दै आपत्ति जनाएका हुन्। उद्योगीको सङ्&zwj;गठन सूर्योदय टी प्रोडक्सन एशोसिएसनले विज्ञप्ति निकाल्दै अनुगमनका क्रममा उद्योगी, मजदुर र किसानबीच ‘असामान्य परिस्थिति सिर्जना गरेको’ बताइएको छ। “उद्योग परिसरमा किसान, मजदूर भेला गराई नगरपालिकाले अभद्र व्यवहार गरेको,” एशोसिएसनबाट निकालिएको विज्ञप्तिमा भनिएको छ। नगरपालिकाले भने एशोसिएसनमार्फत सञ्चालित उद्योगले मापदण्डअनुसार काम नगरेको र त्यसबारेमा आफूहरूले सचेतना जगाइएको बताएको छ। नगरपालिकाले बनाएको मापदण्ड उद्योगले कार्यान्वयन नगराएको भन्दै किसानले आन्दोलन गर्दै आएका थिए। उद्योगीले विभिन्न बहानामा किसानको चियाको मूल्य ‘अत्यन्तै कम्ती’ दिने गरेको किसानले बताएका छन्। रासस