नेपाल बैंकले ८ प्रतिशतमै घरकर्जा दिने, लघु उद्यमीलाई पनि सस्तोमै ऋण
<p>काठमाडौं। नेपाल बैंक लिमिटेडले ७ दशमलव ९९ प्रतिशत ब्याजदरमा घरकर्जा उपलब्ध गराउने भएको छ।</p>
<p>बैंकले घर निर्माण, घर खरिद तथा तला थप गर्नका लागि सस्तो ब्याजदरमै घरकर्जा दिने भएको हो।</p>
<p>घरकर्जासँगै बैंकले आज विज्ञप्ति निकाल्दै वार्षिक ८ दशमलव ९९ प्रतिशत ब्याजदरमै नयाँ लघु उद्यम कर्जा उपलब्ध गराउने जानकारी दिएको छ।</p>
<p>जुन, नेपालमा त्यस क्षेत्रमा उपलब्ध हुने सबैभन्दा सस्तो ब्याजदर भएको बताइएको छ।</p>
<p>योसँगै समृद्ध व्यवसाय कर्जा र घडेरी कर्जासमेत सस्तो ब्याजदरमै दिने बताएको छ।</p>
<p>बैंकले दिने उक्त कर्जा लिन सम्बन्धित निकायमा दर्ता भई नियमितरूपमा सञ्चालन भइरहेको हुनु पर्नेछ।</p>
<p>यसका साथै नयाँ सञ्चालन हुने क्रममा रहेका उद्योग वा व्यापार/व्यवसाय सञ्चालन र विस्तारका लागि २५ लाखदेखि ९९ लाखसम्मको लघु उद्यम कर्जा उपलब्ध हुनेछ।</p>
<p>यस्तै एक करोडदेखि तीन करोडसम्मको चालू तथा स्थिर पुँजी व्यवस्थापनका लागि समृद्ध व्यवसाय कर्जा उपलब्ध गराउने बैंकले जानकारी दिएको छ।</p>
<p>यस्ता कर्जा पाउन व्यवसायलाई आवश्यक पर्ने संरचना निर्माण, यन्त्र वा उपकरण, पुँजीकर्जा उपलब्ध हुनेछ।</p>
<p>लघु उद्यम कर्जा पाउन आवश्यक पर्ने सम्पूर्ण कागजात पेश गरेको ७ दिनभित्र निर्णय गरेर कर्जा दिने बैंकको भनाइ छ।</p>
<p>घडेरी खरिद गरी घर निर्माण गर्ने उपभोक्तालाई लक्षित गरेर बैंकले घडेरी कर्जा पनि ल्याएको छ। जसको वार्षिक ब्याजदर ९ दशमलव ९९ प्रतिशत छ।</p>
<p>यो कर्जाअन्तर्गत खरिद गरिने घडेरी जग्गा कम्तीमा साढे दुई आना वा साढे चार धुरदेखि बढीमा एक रोपनी वा डेढ कठ्ठासम्म क्षेत्रफल भएको हुनु पर्नेछ। कर्जाको अवधि ५ देखि २० वर्षसम्म कायम हुनेछ।</p>
प्रतिक्रिया दिनुहोस्
.jpg)
