Economics, Business and Entrepreneurship

गृहपृष्ठ

पश्चिमी सीमा नाका गड्डाचौकी भएर ६०० विदेशी पर्यटक भित्रिए कञ्चनपुर। पश्चिमी सीमा नाका गड्डाचौकी भएर यस वर्ष ६०० भन्दा बढी विदेशी पर्यटक नेपाल आएका छन। विदेशी पर्यटक कोरोना सङ्क्रमण शुरू हुनुअघि नेपाल आएका हुन्। कोरोना सङ्क्रमण शुरू भएपछि गत चैतदेखि गड्डाचौकी नाका भएर विदेशी पर्यटक आएका छैनन्।      गड्डाचौकीस्थित अध्यागमन कार्यालयका अनुसार सन २०२० को जनवरीदेखि मार्चसम्म ६१८ विदेशी पर्यटक नेपाल आएका छन्। यस अवधिमा ५१७ जना गड्डाचौकी नाका भएर फर्किएका छन्। तीन महीनामा सबैभन्दा बढी पर्यटक फेब्रुअरीमा आएको कार्यालयको तथ्याङ्कमा छ। फेब्रुअरीमा २४९ विदेशी पर्यटक आएका छन्। यसैगरी जनवरीमा २२४ र मार्चमा १४५ जना आएका छन्।      यस्तै, गड्डाचौकी नाकाबाट जनवरीमा सबैभन्दा बढी विदेशी पर्यटक फर्किएका छन्। जनवरीमा २०२ पर्यटक फर्किएका छन। यसैगरी फेब्रुअरीमा १९० र मार्चमा १२५ जना आएका छन्।  गड्डाचौकी नाका भएर सन २०१९ को तुलनामा यो अवधिमा तेब्बर बढी पर्यटक आएका थिए। त्यही हाराहारीमा नाका भएर फर्किएका थिए। सन २०१९ को जनवरीदेखि अगस्टसम्म एक हजार ८६३ विदेशी पर्यटक नेपाल आएकोमा एक हजार ५८० जना गड्डाचौकी नाका भएर फर्किएका थिए।      अध्यागमन कार्यालयका सूचना अधिकारी शैलेन्द्र बडूले कोरोना सङ्क्रमण फैलिएपछि विदेशी पर्यटक आउन बन्द भएको बताए। “कोरोना सङ्क्रमण फैलिनु अघिसम्म पर्यटक आइरहेका थिए। सङ्क्रमण फैलिएर नाका बन्द भएपछि पर्यटक आउन पूर्णरूपमा बन्द भयो”, उनले भने।  सरकारले गत चैत ११ गतेदेखि लकडाउन गरेपछि गड्डाचौकी नाका बन्द गरिएको थियो। भीमदत्त नगरपालिकाले त्यसको एक दिनअघि नै नाका बन्द गराएको थियो। कोरोना सङ्क्रमण सकिएर नाका नखुल्दासम्म गड्डाचौकी नाका भएर पर्यटक आउने कुनै सम्भावना नरहेको सूचना अधिकारी बडूले बताए।  पर्यटक आउन छाडेपछि यस वर्ष अध्यागनले लक्ष्यअनुसार राजश्व सङ्कलन गर्न सक्ने अवस्था छैन। सन २०१९ मा गड्डाचौकी नाका भएर दुई हजार ३३४ विदेशी पर्यटक नेपाल आएका थिए। दुई हजार २९२ पर्यटक नाका भएर फर्किएका थिए। रासस