रुसले बनायो हावामा कोरोना जाँच गर्ने डिभाइस
<p>काठमाडौं। हावामा कोरोना भाइरस बाँच्छ कि बाँच्दैन, हावाबाट यो सर्छ कि सर्दैन भन्ने सवालमा लामो बहस चल्यो तर दुविधा अझै कायम छ।</p>
<p>यही दुविधाबीच रुसले यस्तो डिभाइस तयार पारेको दाबी गरेको छ कि, डिभाइसले कोरोना भाइरस हावामा छ कि छैन भन्ने यकिन गर्छ। उक्त डिभाइसले कोरोनामात्र होइन, ब्याक्टेरिया, विषालु पदार्थ र हावामा अन्य भाइरसको अस्तित्वसमेत रहेको–नरहेको पत्ता लगाउँछ।</p>
<p>यो डिभाइस रुसको केएमजे फ्याक्ट्रीले डिफेन्स मिनिस्ट्री तथा कोरोना भ्याक्सिन बनाउने गामालेया इन्स्टिच्युटसँग मिलेर तयार पारेको हो। यो डिभाइसको नाम ‘डिटेक्टर बायो’ राखिएको छ।</p>
<p>शुक्रबार मस्कोनजिक आयोजित सैन्य औद्योगिक सम्मेलन ‘आर्मी २०२०’ मा यसको प्रदर्शन गरिएको थियो। रुसी केएमजीले संसारमा प्रसिद्ध जेनिट क्यामरा निर्माण गर्दै आएको छ।</p>
<p>डिटेक्टर बायो कुनै पकेट डिभाइस भने होइन, यो रेफ्रिजेरेटरजस्तै देखिन्छ। बाहिरबाट हेर्दा यसमा सानोसानो प्रयोगशाला देखिन्छ, जसले हावालाई आफूतर्फ खिचेर त्यसको परीक्षण गर्छ।</p>
<p>पहिलो चरणमा यसले १० देखि १५ सेकेन्डमा हावामा रहेको भाइरस, ब्याक्टेरिया तथा कुनै विषालु पदार्थ जाँच (अलर्ट पठाउँछ) गर्छ।</p>
<p>परीक्षणका लागि डेढदेखि दुई घण्टासम्म लाग्छ। यो डिभाइस विमानस्थल, मेट्रो या रेल स्टेसनजस्ता सार्वजनिक स्थानमा राख्न सकिने केएमजेले बताएको छ।<br />
(एजेन्सी)<br />
</p>
प्रतिक्रिया दिनुहोस्
.jpg)
