पाँच अन्तरराष्ट्रिय उडानमार्फत फर्किए ३४८ नेपाली
<p>काठमाडाैं। त्रिभुवन अन्तर्राष्ट्रिय विमानस्थलमा आज आवागमन र प्रस्थान दुवै गरी पाँच अन्तरराष्ट्रिय चार्टर्ड उडान भएका छन्। ती उडानमार्फत ३४८ यात्रु नेपाल फर्किएका छन्।</p>
<p>विमानस्थल कार्यालयका अनुसार नेपाल वायु सेवानिगम (नेपाल एयरलायन्स) को वाइड बडी ए ३३० जहाजले जापानको नारिताबाट २१५ नेपाली काठमाडौं ल्याएको छ।</p>
<p>निगमले नियमित उडानअन्तर्गत आज काठमाडाैं-नारिता गन्तव्यमा पहिलो उडान गरेको हो। निगमको जहाज केही बेरअघि मात्र काठमाडौं विमानस्थलमा अवतरण गरेको थियो।</p>
<p>आजै मालिन्डो एयरले क्वालालम्पुरबाट १३३ यात्रु काठमाडौं ल्याएको छ। कार्गो ल्याउन हिमालय एयरलाइन्सको जहाज चीनको चोङकिङ उडेको छ।</p>
<p>कतार एयरवेजले दोहाबाट नौ हजार ३४२ कार्गो नेपाल ल्याएको छ। बिहीबार पनि विभिन्न मुलुकबाट चार अन्तरराष्ट्रिय चार्टर्ड उडान हुँदैछन्। हिमालय एयरलायन्सले क्वालालम्पुर, दोहा र चोङकिङबाट चार्टर्ड उडान गर्दैछ।</p>
<p>यस्तै अफगानिस्तानबाट युके ४ एयर फोर्सको जहाजले काठमाडौँ गन्तव्यमा चार्टर्ड उडान गर्ने विमानस्थलले जनाएको छ।</p>
<p>आन्तरिकतर्फ आज विभिन्न एयरलाइन्सका पाँच चार्टर्ड उडान भएका छन्। तारा एयरले फाप्लु र रारा, सीता एयरले सिमीकोट, मनाङको हेलीले खोटाङ र एयरडाइनेष्टीले बिर्तामोडमा उडान भरेको विमानस्थल कार्यालयले जारी गरेको विज्ञप्तिमा उल्लेख छ।</p>
<p>रासस</p>
प्रतिक्रिया दिनुहोस्
.jpg)
