तोकिएको समयमा मल नल्याउने दुई ठेकेदार कम्पनीसँगको सम्झौता रद्द, करिब ८ लाख डलर धरौटी जफत
<p>काठमाडौं। सम्झौताअनुसार समयमै रासायनिक मल नल्याउने दुई वटा ठेकेदार कम्पनीसँगको सम्झौता रद्द भएको छ।</p>
<p>कृषि सामाग्री कम्पनी सम्झौताअनुसार समयमै मल नल्याउने शैलुङ इन्टरप्राइजेज र होनिको मल्टिपल कम्पनीसँगको सम्झोता रद्द गरेको हो।</p>
<p>शैलुङ इन्टरप्राइजेज नेपाल कम्युनिष्ट पार्टीका अध्यक्ष पुष्पकमल दाहालको घरबेटी समेत रहेका शारदाप्रसाद अधिकारीको कम्पनी हो। यस्तै, होनीको मल्टीपल कम्पनी हुमनाथ कोइरालाको हो।</p>
<p>ठेक्का रद्दसँगै यी दुई वटा कम्पनीले राखेको ७ लाख ८७ हजार ७७७ अमेरिकी डलर धरौटी जफत गरेको छ। यो भनेको झण्डै साढे ९ करोड रुपैयाँ हुन आउँछ।</p>
<p>सामाग्री कम्पनीले शैलुङसँग वैशाख १२ र होनीकोसँग वैशाख २० गतेभित्र नेपालमा मल ल्याउनेगरी सम्झौता गरेको थियो।</p>
<p>तर, त्यसको ४ महिना वित्दा पनि मल नल्याएपछि सम्झौता रद्द गरिएको कम्पनीका प्रबन्ध सञ्चालक नेत्रबहादुर भण्डारीले बताए।</p>
<p>दुवै कम्पनीले मल ल्याउने अन्तिम समय भदौ २० सम्मको थियो। तर, थपिएको समयमा पनि मल ल्याउन नसकेपछि गत शुक्रबार समय थप्न माग गरेका थिए।</p>
<p>दुवै कम्पनीले २५/२५ हजार मेट्रिक टन मल ल्याउने सम्झौता गरेका थिए। मल ल्याउने सम्झौताका क्रममा राखिएको ५ प्रतिशत धरौटी रकम जफत गरिने भएको हो।</p>
<p>आइतबार कृषिमन्त्री घनश्याम भुषालले मन्त्रालयमा पत्रकार सम्मेलन गर्दै दुई कम्पनीसँगको ठेक्का सम्झौता रद्द भएको र धरौटी जफत भएको जानकारी दिए।</p>
<p>साथै, उनले ती दुई कम्पनीलाई कालोसूचीमा राख्ने र क्षतीपूर्ति लिने समेत बताए। र, आवश्यक पर्ने ५० हजार मेट्रिक टन युरिया मल बंगलादेशसँग पैचो लिइने मन्त्रालयले बताएको छ।</p>
<p>त्यसका लागि परराष्ट्रमन्त्रालयले आवश्यक प्रक्रिया अगाडी बढाइसकेको छ।</p>
प्रतिक्रिया दिनुहोस्
.jpg)
