मन्त्री हुँदा वा नहुँदा केही फरक पर्दैन: खतिवडा
<p>काठमाडौं। भर्खरै अर्थमन्त्रीको जिम्मेवारी मुक्त भएका डा. युवराज खतिवडाले आफ्नो साढे दुई वर्षको कार्यकाल सन्तोषजनक रहेको र समग्रमा सरकारको पूर्ण कार्यकाल काम गरेको अनुभूत गरेको बताएका छन्।</p>
<p>आज देखापढीसँग कुरा गर्दै निवर्तमान अर्थमन्त्री खतिवडाले साढे दुई वर्षको कार्यकालमा पूर्ण कार्यकालमा गर्ने जत्तिकै काम गरेको बताए।</p>
<p>“अहिलेको मन्त्रीपरिषदमा सबैभन्दा बढी खटेर प्रधानमन्त्रीले नै काम गर्नुभएको छ। उहाँको खटाईसँग कसैले सक्दैन। त्यसपछि सबैभन्दा बढी खटेर काम गर्ने दोस्रो व्यक्ति म नै हुँ”, खतिवडाले भने, “यस अवधिमा गरेका काम पूर्ण कार्यकालमा गरेका जत्तिकै छन्।”</p>
<p>आफ्नो कार्यकालमा भएका कामहरूमध्ये केहीको नतिजा देखिन थालेको र कपितय कामको भने केही समयपछि नतिजा आउन थाल्ने उनले बताए।</p>
<p>साढे दुई वर्षको कार्यकालमा आर्थिक वृद्धिको जग बलियो बनाएको, चुनौतिपूर्ण मानिएको वित्तीय संघीयताको कार्यान्वयन गरेको, कर र राजश्व प्रशासनमा सुधार गरेको, बजेट प्रणालीमा सुधार ल्याएको लगायतलाई सफल कामको रूपमा खतिवडाले उल्लेख गरेका छन्।</p>
<p>आफ्नो कार्यकालमा पदको जोखिम लिएरै काम गरेको कारण सुरूको दिनबाट नै आफ्नो आलोचना भएको खतिवडाले बताए।</p>
<p>“मैले जति जोखिम अरूले लिन सक्ने स्थिति नै हुँदैन। किनभने, म व्यवसायीक क्षेत्रबाट आएको, राजनीतिलाई नजिकबाट बुझेको र मन्त्री हुँदा वा नहुँदा केही फरक पर्दैन भनेर आफ्नो पद जोखिममा राखेर हिड्ने मान्छे मध्येमा परे”, खतिवडाले भने, “मन्त्रीहरूले सामान्यतया पद जोखिममा राखेर निर्णय गर्ने स्थिति प्राय: मैले देखेको छैन।”</p>
<p>साढे दुई वर्षको अवधिमा अर्थतन्त्रको आधार बलियो बनेको र अबको वर्षहरूमा क्रमश: प्रतिफल प्राप्त हुँदै जाने उनले बताए। <br />
त्यसबाहेक, अब बन्ने अर्थमन्त्रीलाई स्रोत जुटाउन र परिचालन गर्न कुनै समस्या नहुने गरी आर्थिक स्रोतको सुनिश्चितता भएको डा. खतिवडाले बताए।</p>
<p><em>निवर्तमान अर्थमन्त्री खतिवडासँग देखापढीले गरेको विस्तृत अन्तरवार्ता २२ भदौमा प्रकाशन हुनेछ।</em></p>
प्रतिक्रिया दिनुहोस्
.jpg)
