बीमा समूहले उचालेको सेयर बजार १३ अंकले बढ्यो, साढे दुई अर्बको कारोबार
<p>काठमाडौं। नेपाल स्टक एक्सचेञ्ज (नेप्से) परिसूचक लगातार दोस्रो दिन सुधारिएको छ। हिजो मंगलबार ७.३५ अंकले सुधारिएको नेप्से आज बुधबार १३.०५ अंकले सुधारिएको हो।</p>
<p>आज नेप्से परिसूचक बढाउन बीमा समूहले ठूलो भूमिका खेलेका छन्। जीवन र निर्जिवन बीमा समूह फराकिलो अंकले उकालो लागेपछि समग्र नेप्सेलाई नै उचालेका हुन्।</p>
<p>कारोबार खुलेदेखि नै बढ्न थालेको सेयर बजार बन्द हुने समयमा १३ अंकले सुधारिएपछि १५०८.२० अंकमा पुगेको रोकिएको छ।</p>
<p>यसअघि अर्थमन्त्रीले राजीनामा दिएपछि लगातार दुई दिन सेयर बजार परिसूचक घटेको थियो। आइतबार र सोमबार निरन्तर ओरालो लागेपछि मंगलबार सामान्य सुधार आएको थियो।</p>
<p>तर, दुई दिनको गिरावटपछि समालिएको बजारमा २ अर्ब ५६ करोड रुपैयाँको ५७ लाख ९८ हजार कित्ता सेयर खरिदबिक्री भएको छ।</p>
<p>नेप्सेमा कारोबार भएका १२ समूहमध्ये बैंक र विकास बैंक समूहका सूचक ओरालो लागेको छ। बैंक समूह १.८९ अंकले र विकास बैंक समूह ५.४८ अंकले घटेको हो।</p>
<p>यस्तै, आज बीमा समूहको सूचक २६१.८१ अंकले र जिवन बीमा समूहको सूचक १६६.७७ अंकले बढेको छ।</p>
<p>सेयर बजार दोहोरो अंकले सुधारिएको दिन राष्ट्रिय बीमा कम्पनीका लिमिटेडका सेयरधनीहरुले सबैभन्दा बढी कमाएका छन्। आज कम्पनीको सेयर ९८८ अंकले उचालिएको छ।</p>
प्रतिक्रिया दिनुहोस्
.jpg)
