सामूहिक लगानी कोषको संशोधित नियमावली लागू, ‘एक्जिट फि’ आयमा लेखाङ्कन गर्नुपर्ने व्यवस्था
<p>काठमाडौं। सामूहिक लगानी कोषको चौथो संशोधन नियमावली आजबाट लागू भएको छ। नेपाल धितोपत्र बोर्डले उक्त नियमावली आजबाट लागू भएको बताएको हो।</p>
<p>अर्थ मन्त्रालयबाट स्वीकृति भएको संशोधित नियमावलीमा योजना व्यवस्थापकले खुलामुखी योजनाको इकाई पुर्नखरिद गर्दा लिने शुल्क (एक्जिट फि) योजनको आयमा लेखांकन गर्नुपर्ने व्यवस्था गरिएको छ।</p>
<p>यस अघि उक्त आयको लेखांकन योजना व्यवस्थापकले गर्ने गरेका थिए। संशोधित व्यवस्थाले इकाइधनी (लगानीकर्ता)को कोष मजबुत भई बढी प्रतिफल पाउन सहयोग पुग्ने नेपाल धितोपत्र बोर्डका प्रवक्ता निरज गिरीले बताए।</p>
<p>त्यस्तै, उक्त नियमावलीको नियम ४० को उपनियम (४) मा योजना व्यवस्थापक र योजनाको लेखा परिक्षकको नियुक्ती गर्दा बोर्डलाई जानकारी दिई नियुक्त गर्न सक्ने व्यवस्था गरिएको छ।</p>
<p>यस अघि बोर्डबाट स्वीकृति लिएर मात्र गर्न सकिने व्यवस्था रहेको थियो। उक्त व्यवस्था लागू भएसँगै खुलामुखी सामूहिक लगानी योजनाको आयमा बृद्धि भई लगानीकर्ताहरुको हित हुने बोर्डको अपेक्षा रहेको गिरीले बताए।</p>
प्रतिक्रिया दिनुहोस्
.jpg)
