Economics, Business and Entrepreneurship

गृहपृष्ठ

म्याग्दीकाे केरा खेतीमा खपटे घुन र गबारोको प्रकोप म्याग्दी। म्याग्दीमा गरिएको व्यावसायिक केरा खेतीमा खपटे घुन र गवाँरो रोगको प्रकोप देखिएको छ। जिल्लाको बेनी नगरपालिका-२ खबरा, बगरफाँटका साथै मङ्गला र मालिका गाउँपालिकाका विभिन्न क्षेत्रमा गरिएको व्यावसायिक केराखेतीमा रोगको प्रकोप देखिएपछि किसानहरू चिन्तित भएका छन्। केरा गाउँको रूपमा परिचय बनाएको बेनी नगरपालिका-२, खबरा गाउँमा खपटे घुनले सयौं रोपनी क्षेत्रफलमा लगाएको केराका बोट सुक्न थालेका छन्। केरा खेतीलाई मुख्य आम्दानीको स्रोत बनाएका खबराका सोवित शर्मा केराका बोट नपसाउँदै सुक्न थालेपछि चिन्तित छन्। उनले सात रोपनीमा केरा खेती गरेका छन्।  खपटे घुनले पसाएको केरामा दाग देखिने, केराको बोट सुक्दै जाने, बोट ढल्ने र उत्पादन पनि घट्दै गएपछि पेशा संकटमा परेको शर्माले बताए।  हजारी जातको केरा खेतीबाट वार्षिक तीन लाख रुपैयाँ आम्दानी हुँदै आएकोमा रोगको प्रकोपले यस वर्ष उत्पादन र आम्दानी घटेको छ। “झ्याङ भएको केरामा कीरा र रोग लागेपछि सुरूमा पात सुक्दै जान्छ। त्यसपछि गुबो र विस्तारै बोट मर्ने गरेको छ,” उनले भने।  उपचारका लागि बोट वरिपरि काँटछाँट, सफाइ गर्ने र कृषि प्राविधिकको सिफारिसमा कीटनाशक औषधि छर्कँदै आएको कृषक शर्माले जानकारी दिए।  रोकथाम र उपचारमा समन्वय गर्न नसक्दा क्षति पुगेको व्यावसायिक केराखेती गर्दै आएका अर्का कृषक हिरा कुवँरले गुनासो गरे। “लगानी पनि उठ्न गाह्रो हुने देखियो, पसाउन सुरू गरेको केराको पात सुकेर बोट मर्न थाल्छ”, उनले भने। बेनी नगरपालिकासँगै जिल्लाका मालिका, अन्नपूर्ण, रघुगङ्गा र मङ्गला गाउँपालिकाका किसानले व्यावसायिक केरा खेती गर्दै आएका छन्। रासस