मेगा बैंकको १८ लाख कित्ता सेयर बिक्रीमा, एक सय रूपैयाँमा लिलाम बढाबढ
<p>काठमाडौं। मेगा बैंकले १८ लाख कित्ता सेयर बिक्री गर्न शिलबन्दी बोलपत्र आब्हान गरेको छ। बैंकले संस्थापक समूहतर्फको ११ लाख ३३ हजार ३४४ र सर्वसाधारण समूहतर्फको ७ लाख ७ हजार ३९४ गरी १८ लाख ४० हजार ७३९ कित्ता सेयर बोलपत्रबाट बिक्री गर्न लागेको हो।</p>
<p>मेगा बैंकले न्यूनतम शेयर मूल्य एक सय रूपैयाँ तोकेर लिलामबढाबढमा शेयर बिक्री गर्न लागेको हो। अहिले बैंकको सेयर मूल्य प्रतिकित्ता २२८ रुपैयाँ रहेको छ।</p>
<p>बैंकले २०७४ साल भदौ २७ गतेदेखि २०७४ साल कात्तिक १४ गतेसम्म संस्थापक तथा साधारण सेयरधनीहरुका लागि हकप्रद सेयर निष्काशन गरेको थियो। त्यसमध्ये बिक्री नभएर बाँकी रहेको १८ लाख ४० हजार ७ सय ३८ कित्ता सेयर लिलाम बढाबढमा बिक्री गर्न लागिएको हो।</p>
<p>मेगा बैंकको शेयर खरिद गर्न चाहने लगानीकर्ताहरुले असोज ११ देखि १८ गतेभित्र आफूले खरिद गर्न चाहेको प्रतिकित्ता सेयर र दररेट खुलाई गोप्य शिलबन्दीमार्फत आवेदन दिन सक्ने बैंकले जनाएको छ। </p>
<p>न्यूनतम १०० रुपैया र त्यस भन्दा बढी कतिमा सेयर खरीद गर्न चाहेको हो स्पष्ट खुलाई बोलकबोल आवेदन दिनुपर्ने बैंकले जारी गरेको सूचनामा उल्लेख छ। न्यूनतम एक सय कित्ता र अधिकतम एक लाख कित्ता शेयरसम्मको लागि आवेदन गर्न पाउने बताइएको छ। </p>
<p>शेयर खरिद गर्न चाहने लगानीकर्ताले काठमाडौं उपत्यका भित्र मेगा बैंकको कमलादीस्थित मुख्य कार्यालय, नयाँ बानेश्वर, ठमेल, न्यूरोड (पिपलबोट), ज्ञानेश्वर, चाबहिल, बौद्ध, कलंकी, गोंगबु, महाराजगञ्ज, मैतीदेवी, जावलाखेल, पुरानो ठिमी र सूर्यविनायक शाखाबाट सर्वसाधारणहरुले सेयर खरिदका लागि आवेदन दिन सक्ने बैंकले सूचनामा उल्लेख गरेको छ।</p>
<p>यसैगरी, काठमाडौं उपत्यकाबाहिर धनगढी, वीरेन्द्रनगर, नेपालगञ्ज, तुल्सीपुर, भैरहवा, बुटवल, अर्घाखाँची, तम्घास, तानसेन, नारायणगढ, पोखराको सभागृहचोक र चिप्लेढुंगा, हेटौंडा, वीरगञ्ज, सिन्धुली, जनकपुर, धरान, विराटनगर र विर्तामोड शाखाबाट सेयर खरिदका लागि आवेदन दिने व्यवस्था मिलाइएको मेगा बैंकले बताएको छ।</p>
<p>अनलाइनबाट शेयर आवेदन गर्न इच्छुक आवेदनकर्ताहरुले मेगा बैंक वा मेगा क्यापिटल मार्केटस लिमिटेडबाट छाप प्रमाणित गरी आवेदन दिन सक्ने व्यवस्था गरिएको बताइएको छ।</p>
<p>कम्पनीले मेगा क्यापिटल मार्केट्सलाई बिक्री प्रबन्धक तोकेको छ।</p>
प्रतिक्रिया दिनुहोस्
.jpg)
