निरन्तर सुधारिँदै वैदेशिक व्यापार घाटा
<p>काठमाडौं। गत आर्थिक वर्ष २०७६/७७ देखि सुध्रिन थालेको वैदेशिक व्यापार घाटामा निरन्तर सुधार आउन लागेको छ। नेपालबाट निकासी हुने वस्तुको परिमाण बढेर विदेशबाट आयात हुने वस्तुको परिमाण घट्दा व्यापार घाटामा सुधार आउन थालेको हो।</p>
<p>गत वर्ष नेपालले वैदेशिक व्यापार घाटामा १६.८३ प्रतिशतले सुधार आएको थियो। वर्षभरी हुने आयात १५ प्रतिशतले खुम्चिँदा गत वर्षको व्यापार घाटा खुम्चिएको भन्सार विभागले जानकारी दिएको छ।</p>
<p>यस्तै, चालू आर्थिक वर्षको दोस्रो महिना भदौमा पनि व्यापार घाटामा २४.९३ प्रतिशतको सुधार आएको छ। यसअवधिमा २२.०७ प्रतिशतले आयात घटेर १०.४९ प्रतिशतले निर्यात बढ्दा वैदेशिक व्यापार घाटामा उक्त सुधार आएको हो।</p>
<p>गत वर्षको साउन र भदौ महिनामा नेपालले २ खर्ब २९ अर्ब ५० करोड रूपैयाँको आयात गरेको थियो। तर, यो वर्षको सोही अवधिमा जम्मा १ खर्ब ७८ अर्ब रूपैयाँको आयात गरेको छ।</p>
<p>यो भनेको गत वर्षको सोही अवधिको तुलनामा ५१ अर्बभन्दा बढीले आयात घट्नु हो। यस्तै, गत वर्षको भदौ महिनासम्मा नेपालले २० अर्ब ४४ करोड रूपैयाँको निर्यात गरेको छ।</p>
<p>अघिल्लो वर्षको यही अवधिमा जम्मा १८ अर्ब ५० करोड रुपैयाँको निर्यात भएको भन्सार विभागले जानकारी दिएको छ। गत वर्षको सोही अवधिको तुलनामा यो वर्षको भदौ महिनासम्म भएको निर्यातमा आएको वृद्धि १ अर्ब ९४ करोडको हो।</p>
प्रतिक्रिया दिनुहोस्
.jpg)
