ओमानमा अलपत्र परेका १७५ जना नेपालीलाई दूतावासले स्वदेश पठायो
<p>काठमाडौं। नेपाली राजदूतावास ओमनले स्वदेश फर्किनै पर्ने बाध्यतामा रहेका १७५ जना नेपालीलाई सलाम एयरको चार्टर विमानमार्फत नेपाल पठाएको छ।</p>
<p>कोरोना भाइरसको महामारीका कारण प्रभावित १२९ पुरुष र ४६ जना महिलालाई आज नेपाल पठाइएको दूतावासले विज्ञप्तिमार्फत जानकारी दिएको छ। </p>
<p>“सलाम एयरको ओभी–४२७ को सातौं चार्टर उडानमार्फत ओमानबाट १७५ जना नेपालीहरू आज फर्किनु भएको छ,” विज्ञप्तिमा भनिएको छ, “उडान सुरु हुनु अगाडि यात्रु र चालक दलका सदस्यहरूको ७२ घण्टाभित्रको कोभिड–१९ पीसीआर स्वाब परीक्षणको नतिजा रहेको सुनिश्चित गरिएको थियो।”</p>
<p>विमानस्थलमा पुगेर सम्पूर्ण नेपालीहरूलाई ओमानका लागि नेपाली राजदूत सर्मिला पराजुली ढकालले स्वदेश फिर्तीका लागि उनीहरुको सफल यात्रा र सुखमय जीवनका लागि शुभकामना दिइन्। र, यात्रुहरूले देश फर्किने अवसर मिलाइदिएकोमा राजदूत सर्मिलालाई धन्यवादसमेत दिएका थिए।</p>
<p>यो उडानसँगै नेपाली दूतावास ओमान त्यहाँ अलपत्र परेर दूतावासमा सम्पर्क गरेकमध्ये एक हजार १७८ जना नेपाली स्वदेश फर्काउन सफल भएको छ।</p>
<p>ओमानको सर्वोच्च समितिको निर्णयानुसार आगामी अक्टोवर-१ देखि ओमान अन्तराष्ट्रिय विमानस्थल खुल्ने भएकोले ओमान-नेपाल आगामी अक्टोवरबाट नियमित उडान सुरू हुने र सोही उडानहरूबाट पीसीआर लगायत स्वास्थ्य सम्बन्धी आवश्यक प्रोटोकल पूरा गरी सहजरूपमा नेपाल जान सकिने वातावरण निर्माण हुने दूतावासले बताएको छ।</p>
प्रतिक्रिया दिनुहोस्
.jpg)
