सामान किन्दा ठगिएको महसुस गर्नुभयो ? ११३७ मा फोन गर्नुहोस्
<p>काठमाडौं। नेपालीहरूकाे महान चाड दसैँ, तिहार र छठ नजिकिएकाे छ।</p>
<p>सबैजसो मानिस लत्ताकपडा, भाँडाकुँडा, सजावटका वस्तु, खाद्यान्न, मरमसला लगायतका सामग्री किन्ने चटारोमा देखिन्छन्।</p>
<p>तर, किनमेलमा निस्किने सबैजसो उपभोक्ताले हरेक जसो समय आफू ठगिएको महसुस गर्ने गर्छन्।</p>
<p>के तपाईं पनि किनमेलका क्रममा व्यापारीबाट आफू ठगिएको महसुस गर्नुभएकाे छ ?</p>
<p>यदि ठगिएकाे अनुभूति भएमा तत्काल ११३७ मा फोन गर्नुहोस्।</p>
<p>वाणिज्य, आपूर्ति तथा उपभोक्ता संरक्षण विभागले उपभोक्ताहरूको गुनासो सुन्न सञ्चालनमा ल्याएको नम्बर हो, ११३७।</p>
<p>यो नम्बरमा फोन गरेर ठग्ने व्यापारीबारे उजुरी दिँदा उपभोक्ताको पैसासमेत काटिँदैन।</p>
<p>विभागका महानिर्देशक नेत्रप्रसाद सुवेदीले उपभोक्ताले दिएको उजुरीका आधारमा ठगी गर्ने व्यापारीलाई कारबाही गर्ने बताए।</p>
<p>उनले भने, “बजारमा जस्तोसुकै सामान किन्दा ठगिएको महसुस गरेमा विभागले सञ्चालनमा ल्याएको हटलाइन नम्बरमा फोन गरेर उजुरी गर्नुपर्छ।”</p>
<p>उनका अनुसार व्यापारीले म्याद गुज्रिएको सामान बेचे, अखाद्य वस्तु बिक्री गरे, बढी मूल्य लिए, सामान लुकाएको पाए उपभोक्ताले नै उजुरी गर्नुपर्छ।</p>
<p>उपभोक्ताको उजुरीपछि विभागले उक्त उजुरीका आधारमा ठगी गर्ने पसलमा छापा मार्ने र कानुनअनुसार कारबाही गर्ने सुवेदीको भनाइ छ।</p>
<p>त्यसैगरी असामाजिक कार्य गर्ने व्यापारीलाई कारबाही गरेर कानुनी राज्यको उदाहरण दिन तयार रहेको विभागको भनाइ छ।</p>
<p>आफू ठगिएको जानकारी पाएर पनि उजुरी नगरेमा वर्षभर ठगिन पर्ने भएकाले तत्काल उजुरी गर्न विभागले अनुराेध गरेकाे छ।</p>
<p>यसअघि निस्क्रिय रहेको उक्त हटलाइन नम्बर विभागले लकडाउनको समयमा सक्रिय पारेको थियो।</p>
<p>लकडाउनमा, खाद्यान्न अभाव भएमा, ग्यास नपाएमा वा ठगीमा परेमा उक्त नम्बरमा फोन गरेर गुनासो र अर्डर गर्न सकिने व्यवस्था गरिएको थियो।</p>
<p><strong>चाडपर्व लक्षित अनुगमनमा तीव्रता</strong></p>
<p>विभागले दसैँ, तिहार र छठ पर्वमा किनमेल गर्ने उपभोक्ता नठगिउन् भनेर चाडपर्व लक्षित अनुगमनलाई तीव्रता दिएको छ।</p>
<p>विभागका महानिर्देशक सुवेदीले विभागले चारवटा टोली बनाएर बजारमा अनुगमनलाई तीव्रता दिएको जानकारी दिए।</p>
<p>“४/४ जनाको ४ समूह बनाएर पर्वलक्षित अनुगमनलाई तीव्रता दिइएको छ”, उनले भने “योसँगै प्रहरी प्रशासनसँगको सहकार्यमा चल्ने अनुगमनको नियमित कार्य पनि चलिरहेको छ।”</p>
<p>उनका अनुसार उक्त ४ टोलीमा २० जनासम्मको सदस्य रहन्छन्। </p>
प्रतिक्रिया दिनुहोस्
.jpg)
