Economics, Business and Entrepreneurship

गृहपृष्ठ

वैदेशिक रोजगार कल्याणकारी कोषको भुक्तानी अब अनलाइनबाट काठमाडौँ। वैदेशिक रोजगार बोर्डले भुक्तानी सेवा प्रदायक संस्थामार्फत् वैदेशिक रोजगार कल्याणकारी कोषमा रकम जम्मा गर्न सकिने व्यवस्था गरेको छ। सेवाग्राहीले सजिलै सेवा लिन सकून् भन्ने र बोर्डको सेवालाई प्रविधिमैत्री बनाउने उद्देश्यले कल्याणकारी कोषको रकम अनलाइनबाटै भुक्तानी गर्न सकिने व्यवस्था मिलाइएको बोर्डले जनाएको छ। नेपाल राष्ट्र बैंकबाट वित्तीय कारोबार गर्न अनुमित प्राप्त इसेवा, फोन पे प्रालि र स्प्यारो पे प्रालिमार्फत सरल र सहज रूपमा कोषको रकम भुक्तानी गर्न सकिने बोर्डका कार्यकारी निर्देशक राजन श्रेष्ठले जानकारी दिएका छन्। वैदेशिक रोजगार नियमावली, २०६४ को नियम २४ बमोजिम श्रम स्वीकृति लिई वैदेशिक रोजगारीमा जाने नेपाली नागरिकले कल्याणकारी कोषमा रकम जम्मा गर्नुपर्ने व्यवस्था छ। वैदेशिक रोजगारीमा जाने कामदारले करार अवधि तीन वर्षको भएमा १,५०० रूपैयाँ र तीन वर्षभन्दा बढी भएमा २,५०० रूपैयाँ कोषमा जम्मा गर्नुपर्छ। बोर्डले सोही कोषमा जम्मा भएको रकमबाट वैदेशिक रोजगारीका क्रममा मृत्यु तथा अङ्गभङ्ग, बिरामी भएमा राहत रकम उपलब्ध गराउँदै आएको छ। त्यस्तै, मृतक कामदारको सन्ततिको शैक्षिक भविष्यलाई उज्ज्वल बनाउन शैक्षिक छात्रवृत्तिसमेत यसै कोषबाट प्रदान गरिँदै आएको छ। भुक्तानी सेवा प्रदायकबाट सेवा लिएबापत् सेवाग्राहीले कुनै पनि थप शुल्क तिर्नु नपर्ने बोर्डले प्रष्ट पारेको छ। पछिल्ला समय आफ्नो सेवालाई प्रविधिमैत्री बनाउँदै लगेको बोर्डले वैदेशिक रोजगारमा मृत्यु तथा अङ्गभङ्ग भएका व्यक्तिका परिवारलाई राहतका लागि स्थानीय तहबाटै निवेदन दिने र सम्बन्धितको बैंक खातामा रकम जम्मा गरिदिने व्यवस्था मिलाएको छ। रासस