मुलुकको आर्थिक विकासमा सहयोग गर्न सञ्चारमन्त्री गुरुङकाे आग्रह
<p>काठमाडाैं। सञ्चार तथा सूचना प्रविधिमन्त्री पार्वत गुरुङले पत्रकारिताका माध्यमबाट मुलुकको आर्थिक विकासमा सहयोग गर्न आमसञ्चारमाध्यमसँग अपिल गरेका छन्।</p>
<p>नेपाल आर्थिक पत्रकार सङ्‍घ (नाफिज)को पाँचौं महासभालाई यहाँ आज समापन गर्दै उनले कोभिड-१९ सँगै ओरालो लागेको मुलुकको आर्थिक अवस्था उकास्ने गरी भ्रामकभन्दा पनि सत्यसथ्य समाचार प्रकाशन/प्रसारण गर्न आग्रह गरे।</p>
<p>सरकारका प्रवक्तासमेत रहेका मन्त्री गुरुङले भने, “जनतालाई सही सूचना दिँदै सभ्य समाज निर्माण गर्न, आमसञ्चार क्षेत्रको महत्त्वपूर्ण भूमिका हुन्छ, त्यसैले आचारसंहिता र मापदण्डभित्र रहँदै पत्रकारिता क्षेत्र परिपक्व र जिम्मेवार बन्न जरुरी छ।” उनले नेपाली पत्रकारिता क्षेत्र उद्ययमशील बन्नुपर्ने बताउँदै मिडियामा हरेक हिसाबले लगानीकर्ता बलियो हँदै जाने र श्रमजीवी पत्रकार कमजोर हुँदै जाने प्रवृत्तिको अन्त्य हुनुपर्नेमा जोड दिए। </p>
<p>नेपाल चेम्बर अफ कमर्सका वरिष्ठ उपाध्यक्ष राजेन्द्र मल्लले अबको पत्रकारिता देशको आर्थिक उत्थानमा केन्द्रित हुनुपर्नेमा जोड दिए। </p>
<p>महासभाले १३ सदस्यीय कार्यसमिति चयन गरेको छ। नाफिजको नयाँ अध्यक्षमा द राइजिङ नेपालका पत्रकार मोदनाथ ढकाललाई निर्वाचित गरेको छ। त्यसैगरी रेडियो नेपालका भुवन आचार्य र आर्थिक न्युजका मेनुका कार्की उपाध्यक्षमा चयन भएका छन्। महासचिवमा नारायण पौडेल, सचिवमा रोयल आचार्य, सहसचिव महमल अजमत अली र कोषाध्यक्षमा परमेश्वर अधिकारी चयन भएका छन्।</p>
<p>महासभाले प्रजिता बुढाथोकी, फणीन्द्र दाहाल, रोबिन पौडेल, नवीन ढुङ्‍गाना र दीपक भट्टलाई सदस्यमा चयन गरेको छ। </p>
<p>कार्यसमितिको पहिलो बैठकले गोपालचन्द्र सुवेदी र दिलु कार्कीलाई कार्यसमिति सदस्यमा मनोनीत गरेको छ। संस्थाका निवर्तमान अध्यक्ष सीताराम भट्टराई स्वतः कार्यसमिति सदस्य बनेका छन्। </p>
<p>नवनिर्वाचित अध्यक्ष ढकालले संस्थाले आगामी दिनमा पेसागत सरोकार राख्ने अन्तर्राष्ट्रिय सङ्‍घसंस्थासँग सम्बन्ध विकास गर्ने बताए। <em>रासस</em></p>
प्रतिक्रिया दिनुहोस्
.jpg)
