Economics, Business and Entrepreneurship

गृहपृष्ठ

दाना-खुर्कोट प्रसारणलाइन निर्माण सकियो म्याग्दी। म्याग्दीमा कालीगण्डकी करिडोरअन्तर्गत २२० केभी क्षमताको दाना-खुर्कोट सबस्टेसन र प्रसारणलाइन निर्माण सकिएको छ।  म्याग्दीको दाना र पर्वतको खुर्कोटमा दुई सबस्टेसन तथा बीचमा ११० टावर बनाएर ३९.६ किलोमिटर तार तान्ने काम सकिएको छ। आयोजनाका सहायक प्रबन्धक लक्ष्मण फुँयालले दाना र खुर्कोटमा सबस्टेसनका साथै प्रसारणलाइनको पूर्वाधार निर्माण र उपकरण जडानको काम सकिएको बताए। “टावर ठड्याउने, तार तान्ने र सबस्टेसनको उपकरण जडान सकेर आन्तरिक परीक्षण सुरु गरेका छौँ,” उनले भने, “सबस्टेसन चार्ज र परीक्षणको तयारीका लागि कार्यतालिका बनाउँदैछौँ।” करिब १५ दिनभित्र सबस्टेसन र प्रसारणलाइन सञ्चालनमा ल्याउने तयारी छ। एसियाली विकास बैंकको सहयोगमा नेपाल विद्युत् प्राधिकरणले सन् २०१६ देखि सुरु गरेको यो आयोजना लक्ष्यभन्दा दुई वर्ष ढिला सकिएको हो। सन् २०१८ को नोभेम्बरमा सम्पन्न गर्ने लक्ष्य राखिएको थियो। आयोजना निर्माणमा तीन अर्ब रुपैयाँ खर्च भएको नेपाल विद्युत् प्राधिकरणले जनाएको छ। सन् २०१६ मा दुई अर्ब ९० करोड रुपैयाँमा टाटा प्रोजेक्ट्स र चिन्ट इलेक्ट्रिक जेभीसँग ठेक्का सम्झौता भएको थियो। कालीगण्डकी तथा सहायक नदी र मुस्ताङमा निर्माण हुने जलविद्युत् आयोजनाबाट उत्पादित बिजुली केन्द्रीय ग्रिडमा जोड्न सबस्टेसन र प्रसारणलाइन निर्माण गरिएको आयोजना प्रमुख चन्दनकुमार घोषले बताए। “यो सबस्टेसन र प्रसारणलाइन कालीगण्डकी करिडोरको विद्युत् विकासको आधार हो,” उनले भने, “सबस्टेसन र प्रसारणलाइन कुरेर बसेका धेरै जलविद्युत् आयोजना निर्माणले तीव्रता पाउनेछन्।” जग्गा अधिग्रहण, मुआब्जा वितरण, वन क्षेत्रको जग्गा प्राप्ति, बाढी र पहिरोका कारण आयोजना निर्माण प्रभावित भएको हो। म्याग्दीका प्रमुख जिल्ला अधिकारी उमाकान्त अधिकारीले लामो समयको प्रयासपछि पोखरेबगरको विवाद समाधान गरेर आयोजना निर्माण गर्ने वातावरण बनाएको बताए। पोखरेबगरका जग्गाधनीसँगको विवादले त्यहाँ छ टावर बनाउन दुई वर्षसम्म प्रयास गर्नुपरेको थियो। आयोजना निर्माणसँगै ४२ मेगावाट क्षमताको मिस्ट्रीखोला, पाँच मेगावाटको घलेम्दीखोला र १३.६ मेगावाट क्षमताको थापाखोला जलविद्युत् आयोजनाको विद्युत् केन्द्रीय लाइनमा जोडिने अन्नपूर्ण गाउँपालिकाका अध्यक्ष डमबहादुर पुनले बताए। थापाखोला र घलेम्दी यसअघि नै निर्माण सम्पन्न भए पनि प्रसारणलाइनको अभावमा पूर्ण क्षमतामा सञ्चालन हुनसकेका थिएनन्। निर्माणको अन्तिम चरणमा पुगेको मिस्ट्रिखोला जलविद्युत् आयोजनाले संरचनाको परीक्षण सुरु गरेको छ। रासस