मूल्यवृद्धि २.९३ प्रतिशतमा सीमित, घिउ तेल १३ प्रतिशतले महँगियो
<p>काठमाडौं। चालु आर्थिक वर्षको पाँच महिनामा मुलुकको मूल्यवृद्धि २.९३ प्रतिशतमा सीमित भएको छ। </p>
<p>नेपाल राष्ट्र बैंकले गएको मङ्सिर महिनासम्मको मुलुकको आर्थिक तथा वित्तीय स्थिति सार्वजनिक गर्दै उक्त जानकारी दिएको हो।</p>
<p>यो तथ्याङ्कले गत वर्षको तुलनामा यो वर्ष मूल्यवृद्धि पूर्ण नियन्त्रणमा रहेको देखाउँछ। गत वर्षको सोही अवधिमाभन्दा यो वर्ष मूल्यवृद्धि (मुद्रास्फीति) ३.६२ विन्दुले घटेको देखिन्छ। गत आव (२०७६÷७७) को मङ्सिर महिनासम्म यस्तो मूल्यवृद्धि ६.५५ प्रतिशत रहेको थियो। </p>
<p>समीक्षा अवधिमा खाद्य तथा पेय पदार्थ समूहको मूल्यवृद्धि ५.२३ प्रतिशत र गैरखाद्य तथा सेवा समूहको मूल्यवृद्धि १.१६ प्रतिशत रहेको छ। </p>
<p>२०७६ मंसिरकोे तुलनामा २०७७ मंसिरमा फलफूल, घिउ तथा तेल, तरकारी र दाल तथा गेडागुडी उपसमूहको मूल्यवृद्धि क्रमशः १४.७५ प्रतिशत, १३.०१ प्रतिशत, ११.४४ प्रतिशत र १०.७४ प्रतिशत रहेको राष्ट्र बैंकले जनाएको छ। </p>
<p>समीक्षा अवधिमा क्षेत्रगत आधारमा हिमाली भेगमा सबैभन्दा धेरै ४.२२ प्रतिशतले मूल्यवृद्धि भएको पाइएको छ। त्यसैगरी पहाडमा ३.९५ प्रतिशत, काठमाडौं उपत्यकामा ३.७१ प्रतिशत र तराईमा २.३५ प्रतिशतले मूल्यवृद्धि भएको राष्ट्र बैंकको तथ्यांक छ। </p>
<p>गत वर्षको मङ्सिरमा काठमाडौं उपत्यकामा सबैभन्दा बढी ७.६० प्रतिशत, तराईमा ६.६६ प्रतिशत, पहाडमा ५.२७ प्रतिशत र हिमालमा ४.८३ प्रतिशतले मूल्यवृद्धि भएको थियो।<br />
</p>
प्रतिक्रिया दिनुहोस्
.jpg)
