Economics, Business and Entrepreneurship

गृहपृष्ठ

चार जोडीले जिते ‘बञ्जी कपल च्यालेन्ज’ पोखरा। पोखरा-२४ हेम्जास्थित हाइग्राउण्ड एडभेन्चर्सले दुई साताअघि शुरु गरेको ‘कपल बञ्जी च्यालेन्ज’बाट चार जोडी विजेता बनेका छन्।  कोभिड-१९ का कारण लामो समयदेखि बन्द रहेको बञ्जीमा जोडीको आर्कषण बढाउन कम्पनीले यही माघ एकदेखि १३ गतेसम्म देशभरीबाट च्यालेन्जमा सहभागी हुन आह्वान गरेको थियो। देशभरिबाट करिब पाँच सयजनाले कपल बञ्जी च्यालेन्ज स्वीकार गरी सहभागिता जनाएको कम्पनीका पोखरास्थित शाखा प्रबन्धक दिनेश महर्जनले जानकारी दिए। “कोभिड-१९ का कारण बन्द बञ्जी असोज १९ देखि सञ्चालनमा आएको हो। विशेष गरी आन्तरिक पर्यटकको रोजाइँमा बञ्जी परेको छ भने जोडीको आर्कषण पनि बढिरहेको छ। हामीले यसैलाई मध्यनजर गर्दै कपल बञ्जी च्यालेन्जका लागि देशभरीबाट आह्वान गरेका थियौँ,” उनले भने। उनले ‘च्यालेन्ज एक्सेप्ट’ गरेर पाँच सयजनाले सहभागिता जनाएको र लक्की ड्रमार्फत् चारजना विजेता हुन सफल भएको बताए। हाइग्राउण्ड बञ्जी नेपालको पहिलो टावर बञ्जी र एशियामा पहिलो व्यवसायिक टेन्डम भएको उनको भनाइ छ। लक्की ड्रबाट काठमाडौँका आयुष शाक्य, पोखराकी प्रीति गुरुङ, बुटवलका अनुप खड्का र काठमाडौँका राजश्रीको जोडी विजेता बन्न सफल भएका छन्।  सो अवसरमा पोखरा पर्यटन परिषद्का अध्यक्ष गोपी भट्टराईले आन्तरिक पर्यटकलाई साहसिक खेलमा आकर्षण गर्ने यस्ता कार्यक्रम सहयोगी हुने बताए। उनले भने, “अहिले सुस्ताएको पर्यटनलाई उकास्न एउटा आधार भनेकै आन्तरिक पर्यटक हो, पोखरा साहसिक खेलको शहर पनि भएकाले यहाँँ एडभेन्चर्स स्पोटर्स टुरिज्मको पनि प्रशस्त सम्भावना छ, यसलाई प्रवर्द्धन गर्न पर्यटकलक्षित कार्यक्रम गर्नुपर्छ।”  उनले यस्ता पर्यटकलक्षित कार्यक्रमले पोखरा खुला र सुरक्षित छ भन्ने सन्देश दिने बताए। ट्रेकिङ एजेन्सिज एशोसिएशन अफ नेपाल (टान) पश्चिमाञ्चलका अध्यक्ष सुशीलराज पौडेलले पोखरामा साहसिक गतिविधि धेरै रहेकाले साहसिक खेलमा रुचि राख्नेका लागि पनि पोखरा उत्कृष्ट गन्तव्य भएको बताए। ‘कल्चर नेचर र एड्भेन्चर्स’ पोखराको विशेषता रहेकाले यसलाई प्रवर्द्धन गर्न आवश्यक रहेको उनको भनाइ छ। प्रबन्धक महर्जनका अनुसार विजेताले पोखरा लेकसाइडको तीनतारे होटलमा एक रातको खाना र बस्नको सुविधा र टेण्डम बञ्जीको उपहार प्राप्त गरेका छन्। त्यसै गरी फेब्रुअरी १४ अर्थात् प्रणय दिवसको अवसरमा पनि कम्पनीले माघ १४ गतेदेखिनै  ‘गिभ अवे’ कार्यक्रम शुरु गरेको र त्यसको नतिजा फेब्रुअरी १० मा तीनजना विजेता छानिने कम्पनीले जनाएको छ। रासस