Economics, Business and Entrepreneurship

गृहपृष्ठ

एयरलाइन्सलाई बक्यौता बुझाउन निर्देशन काठमाडौं। नेपाल नागरिक उड्डयन प्राधिकरण (क्यान)ले वर्षौंदेखि करोडौं बक्यौता नतिर्ने एयरलाइन्सलाई ३० दिनभित्र भुक्तानी गर्न ताकेता गरेको छ।  क्यानले आज सार्वजनिक सूचना जारी गर्दै उडान सेवा बन्द भएका एयरलाइन्सले क्यान र विमानस्थल कार्यालयलाई तिर्नुपर्ने सेवा शुल्क तथा रोयल्टी बुझाउन आग्रह गरेको हो। क्यानकाअनुसार यसरी उडान सेवा बन्द भएका आन्तरिक उडानका ११ एयरलाइन्सले नौ करोड बक्यौता बुझाउन बाँकी छ।  एयरलाइन्सले क्यानलाई बुझाउनु पर्ने रकम पटकपटक सूचना गर्दा पनि नबुझाएकाले पुनः सूचना जारी गर्दै बन्द भएका एयरलाइन्सका सञ्&zwj;चालकलाई तत्काल बाँकी रकम भुक्तान गर्न निर्देशन दिएको हो । उनीहरूलाई सूचना प्रकाशित भएको मितिले ३० दिनभित्रमा रकम र नियमानुसार लाग्&zwj;ने विलम्ब शुल्कसमेत बुझाउन भनिएको छ। यदि प्राधिकरणले निर्धारण गरेको रकम तिर्न नपर्ने कुनै प्रमाण भएमा सोसमेत पेश  गर्न आग्रह गरिएको छ। तोकिएको समयमा पनि हिसाब मिलान वा रकम बुझाउन नआएमा सञ्&zwj;चालकलाई कालोसूचीमा राखिने प्राधिकरणले चेतावनी दिएको छ। कालोसूचीमा परेका सञ्&zwj;चालकले भविष्यमा हवाई सेवा, विमानस्थल तथा प्राधिकरणसँग सम्बद्ध कुनै किसिमको काम कारबाही तथा व्यापार व्यवसायमा सहभागी हुन नपाउने प्राधिकरणले उल्लेख गरेको छ। सबैभन्दा धेरै नेकोन एयरको बक्यौता चार करोड ७० लाख ६० छ। त्यस्तै कस्मिक एयरको तीन करोड ४७ लाख बाँकी रहेको छ। त्यस्तै शिवानी एयरको ५५ लाख ५१ हजार,  गोरखा एयरको २० लाख, कर्णाली एयरको १७ लाख ४६ हजार, माउन्टेन एयरको १७ लाख ४६ हजार, साङ्ग्रिला एयरको १५ लाख ३७ हजार, स्काइलाइन एयरको १५ लाख ५० हजार, एयर काष्टमण्डपको सात लाख ३८ हजार, नेपाल एयरवेजको पाँच लाख ५० हजार र अल्पाइन एयरको ७२ हजार रहेको छ । हाल नेपालमा १० हेलिकप्टर कम्पनीसहित १९  वायुसेवा प्रदायक कम्पनीले आन्तरिक उडान भर्दै आएका छन्।