नेपाललाई ८ महिनामा ८ खर्ब ६३ अर्ब व्यापार घाटा
<h3>९ खर्ब ४३ अर्बको आयात, ८० अर्बको निर्यात</h3>
<p>काठमाडौं। चालू आर्थिक वर्षको सात महिनासम्म खुम्चिँदै आएको नेपालको वैदेशिक व्यापार घाटा फागुनमा आएर बढेको छ। नेपालको आयात र निर्यात दुवै हिस्सा बढे पनि व्यापार घाटा उकालो लागेको छ।</p>
<p>भन्सार विभागले सार्वजनिक गरेको साउन देखि फागुनसम्मको तथ्यांक अनुसार यस अवधिमा नेपालको वैदेशिक व्यापार घाटा १.६३ प्रतिशतले बढेको छ। जबकी, माघ महिनासम्म नेपालको वैदेशिक व्यापार घाटा ०.६६ प्रतिशतले खुम्चिएको थियो।</p>
<p>नेपालले आर्थिक वर्ष २०७७/७८ को फागुन महिनासम्ममा ८ खर्ब ६३ अर्ब रुपैयाँ व्यापार घाटा बेहोरेको छ। जुन, अघिल्लो आर्थिक वर्षको यही अवधिमा ८ खर्ब ४९ अर्बमा सिमित थियो।</p>
<p>विभागका अनुसार अघिल्लो महिना अर्थात माघसम्ममा नेपालको व्यापार घाटा ७ खर्ब ३३ अर्ब रुपैयाँ कायम थियो। जुन, त्यही अवधिको अघिल्लो वर्षमा ७ खर्ब ३८ अर्ब रुपैयाँ थियो।</p>
<h3>८ महिनापछि बढ्यो आयात</h3>
<p>चालू आर्थिक वर्षको आठौं महिनामा आएर विदेशबाट नेपालतर्फ आउने आयातको परिणाम बढेको छ। तथ्यांक अनुसार अघिल्लो वर्षको ८ महिनामा नेपालले ९ खर्ब २४ अर्ब रुपैयाँको आयात गरेको थियो।</p>
<p>तर, यस वर्षको फागुन महिनासम्ममा नेपालले विदेशबाट ९ खर्ब ४३ अर्ब रुपैयाँको आयात गरेको छ। जुन, अघिल्लो वर्षको यही अवधिको तुलनामा १.६३ प्रतिशतको वृद्धि हो।</p>
<p>आयातको परिणाम बढेसँगै नेपालको व्यापार घाटा पनि चुलिएको छ।</p>
<h3>जम्मा ८० अर्बको निर्यात</h3>
<p>यस अवधिमा नेपालबाट विदेशतर्फ जम्मा ८० अर्ब ७७ करोड रुपैयाँको निर्यात भएको छ। जुन, अघिल्लो वर्षको यही अवधिको तुलनामा ७.१८ प्रतिशतले बढी हो।</p>
<p>अघिल्लो वर्ष नेपालबाट विदेशतर्फ ७४ अर्ब ९० करोड रुपैयाँको निकासी भएको थियो। यस वर्ष, नेपालबाट भारततर्फ प्रशोधित भटमासको तेल, अलैँची र चियाको निकासी बढ्दा समग्र निर्यात नै सुधारिएको देखिएको छ।<br />
</p>
प्रतिक्रिया दिनुहोस्
.jpg)
