बुन्डेसलिगा ९ मेमा गर्न तयार, प्रतिक्षा सरकारी निर्णयको
<p>काठमाडौं। कोभिड-१९ महामारीका कारण युरोपका ठूला लिगसहित विश्‍वकै फुटबल गतिविधि स्थगित भएको अवस्थामा जर्मन बुन्डेसलिगा भने सुरु गर्ने तयारी भइरहेको छ। </p>
<p>जर्मन फुटबल लिग (डीएफएल) ले बुन्डेसलिगा र दोस्रो डिभिजन लिगको जारी सिजन समयमै सक्ने तयारी गरेको हो। बिहीबार ३६ प्रमुख क्लबहरूसँग अर्को महीनाबाट सिजन सुरु गर्ने विषयमा छलफल भएको थियो। जर्मनीका फुटबल अधिकारीहरूले खाली रंगशालामा फुटबल खेलाउन ‘ग्रिन सिग्‍नल’ पाए पनि उनीहरूले धेरै प्रश्‍नको सामना गर्नुपर्ने हुनसक्छ।</p>
<p>‘‘९ मेदेखि शुरू गर्ने हो भने हामी तयार छौं। त्यसभन्दा पछि गर्ने हो भने त्यसका लागि पनि तयार छौं,’’ डीएफएलका कार्यकारी प्रमुख क्रिष्‍टियन सेइफर्टले भने, ‘‘हाम्रो राजनीतिज्ञहरूले कस्तो निर्णय गर्छन् भन्‍ने निर्णायक हुन्छ। कहिले गर्ने भनेर हामीले भन्दा उनीहरूले निर्णय गर्ने हो। दर्शकविना फुटबल खेल्नु हाम्रो चाहना होइन। तर अहिले त्यही गर्नुपर्ने अवस्था छ।’’</p>
<p>जर्मनीका राजनीतिज्ञहरूले २४ अक्टोबरसम्म ठूलो भीड हुने सबै गतिविधिमा रोक लगाएको छ। यस निर्णयले बुन्डेसलिगामा अर्को सिजनभन्दा अगाडि दर्शकसहित खेल्न सम्भव छैन। त्यसैले जर्मनीमा दर्शकविना खेल्नुको विकल्प छैन। दर्शक नभए पनि खेलाडी, प्रशिक्षक टिम, मेडिकल टिम, रेफ्री, बल ब्वाई, ग्राउण्ड स्टाफ, प्रविधिक, सुरक्षा अधिकारी, टेलिभिजन प्रोडक्सन टिम, भिडियो सहायक रेफ्रीलगायत रंगशालाभित्र हुन्छन्। यसबाट एक खेल खेलाउन तीन सयको हाराहारीमा जनशक्ति चाहिन्छ। </p>
<p>डीएफएलले जस्तोसुकै योजना प्रस्ताव गरे पनि सरकारले अस्वीकृत गर्न सक्ने सम्भावना हुन्छ। तर उनीहरूले पनि व्यावसायिक फुटबल क्लबहरू आर्थिक रूपमा संघर्ष गरिरहेको बुझेका छन्। त्यसैले क्लबहरूको अवस्थालाई मध्यनजर गरेर स्वीकृती दिने सम्भावना छ। </p>
<p>‘‘फुटबलविनाको सप्ताहन्तभन्दा फुटबलसहितको सप्ताहन्त धेरै ठीक छ। त्यसकारण मैले दर्शकविनाको रंगशालामा फुटबल हुने सम्भावना देखेको छु,’’ वाबरिया राज्यका प्रमुख मार्कुस सोडरले भनेका छन्। </p>
<p>सोडर र उत्तर राइन-वेस्टफेलियाका प्रमुख अर्मिन लास्चेतले ९ मेमा बुन्डेसलिगा सुरु गर्न सम्भव रहेको बताएका छन्। यस विषयमा संघीय र १६ वटा प्रान्तिय सरकारबीच ३० अप्रिलमा छलफल हुने सम्भावना छ। यससँगै अर्को महिना फुटबल खेलाउनका लागि बाटो खुल्ने सम्भावना छ।</p>
प्रतिक्रिया दिनुहोस्
.jpg)
