धनगढीमा अस्पताललाई साढे १८ लाखको भेन्टिलेटर र सुरक्षा सामग्री हस्तान्तरण
<p>धनगढी। सुदूरपश्चिम प्रदेशका मुख्यमन्त्री त्रिलोचन भट्टले कोभिडको संक्रमण अझ फैलन सक्ने भएकाले थप सजग हुँदै तयारीलाई बढाउनुपर्ने आवश्यकता औँल्याएका छन्।</p>
<p>कोका-कोला र नेपाल रेडक्रस सोसाइटी (नेरेसो) को साझेदारी अन्तर्गत कोभिड–१९ को महामारीमा अग्रपंक्तिमा खटिने स्वास्थ्यकर्मी, विरामी र स्वयंसेवकहरुको सुरक्षा अभिवृद्धिको लागि सेती प्रादेशिक अस्पताल धनगढी, कैलालीको प्राङ्गणमा सुरक्षा सामग्री तथा उपकरण अस्पताललाई हस्तान्तरण गर्दै उक्त कुरा बताएका हुन्।</p>
<p>सेती प्रदेश अस्पतालका मेडिकल सुपरीटेडेन्ट डा. हेमराज पाण्डेलाई सामग्री हस्तान्तरण गर्दै उनले भने, “रेडक्रसले सरकारलाई सहयोग गर्दैछ र निष्पक्षतालाई ध्यान दिँदै थप सहयोग गर्न रेडक्रस लगायतको संस्थालाई अनुरोध गर्दछु।” </p>
<p>हस्तान्तरण गरिएका सामग्रीमा १६ लाख ३२ हजार ८५० सय रूपैयाँको आइसीयूमा प्रयोग हुने एक भेन्टिलेटरका साथै ६ हजार सर्जिकल मास्क, २५०० जोडी सर्जिकल पन्जा, ५० थान सुरक्षा पोसाक, केएन ९५ मास्क २०० थान र २५ थान सुरक्षा चस्मा छन्।</p>
<p>ती सामग्रीहरूको जम्मा मूल्य १८ लाख ५१ हजार १०० रहेको नेरेसोका सञ्चार निर्देशक दिव्यराज पौडेलले जानकारी दिए।</p>
<p>यसअघि गत असारमा पहिलो चरणमा मास्क, सुरक्षा बुट, स्यानिटाइजर, क्लोरिन झोल र साबुन अस्पताललाई उपलव्ध गराइएको थियो।</p>
प्रतिक्रिया दिनुहोस्
.jpg)
