Health and Lifestyle

गृहपृष्ठ

भक्तपुर नगरसभाद्वारा श्वासप्रश्वास पुनर्स्थापना केन्द्रसम्बन्धी नियमावली पारित भक्तपुर । भक्तपुर नगरपालिकाका प्रमुख सुनिल प्रजापतिको अध्यक्षतामा बसेको भक्तपुर नगरपालिकाको आठौं नगरसभाले ‘श्वासप्रश्वास पुनःस्थापना केन्द्र सञ्चालन नियमावली, २०७७’ सर्वसम्मतिले पारित गरेको छ । श्वासप्रश्वास पुनःस्थापना केन्द्रले दीर्घ दमखोकी भएका व्यक्तिहरूको रोगको निदान गर्ने र श्वासप्रश्वास पुनःस्थापना सेवा प्रदान गर्ने, दीर्घ दमखोकी भएका व्यक्तिहरूको प्रारम्भिक निदान, उपचार र पुनःस्थापनाका लागि सेवा प्रदायकहरूको क्षमता अभिवृद्धि गर्ने र राष्ट्रिय, प्रादेशिक र स्थानीय स्तरमा उत्कृष्ट केन्द्रको रूपमा श्वासप्रश्वास पुनःस्थापनासम्बन्धी विशेषज्ञता र संशाधनहरू प्रदान गर्नेलगायतका उद्देश्य भएको सो नियमावलीमा उल्लेख छ । ‘श्वासप्रश्वास पुनःस्थापना केन्द्र सञ्चालन नियमावली २०७७’बारे छलफलमा नगर सभासद्हरू जितेन्द्र मुंनकर्मी, श्यामसुन्दर मातां, शिवप्रसाद बाला, गोविन्द दुवाललगायतले आ–आफ्ना धारणा राखेका थिए ।  छलफलमा उठेका जिज्ञासामाथि विधायन समितिका संयोजक हरिराम सुवालले प्रष्ट पारेका थिए ।  नगर सभाको विशेष समयमा नगरवासीहरूको समस्या र नगरपालिकाले जनताको पक्षमा गर्नुपर्ने कार्यहरूलगायतका विषयमा विचार राख्दै सभासद्हरू ज्ञानकुमार मगजु, सम्झना खाइजु, शिवप्रसाद बाला, राजेन्द्र माक, इन्द्रबहादुर प्याठ, तुल्सीलक्ष्मी दुमरु, हेरा ख्याजु, सूर्यप्रसाद श्रेष्ठले वडामा सफाइ मजदुरको कमी भएको, तरकारी बजार व्यवस्थापनमा पहल गर्नुपर्ने, व्यवस्थित वधशाला निर्माण गर्नुपर्ने, माहेश्वरी खेलमैदानलाई राष्ट्रिय स्तरको खेलमैदानको रूपमा विकास गर्नुपर्ने, इन्द्रायणीको ढुंगेधारा र हाकुफोहिटीको निकास मर्मत गर्नुपर्ने, करको दायरा बढाउनुपर्ने, कृषि विशेषज्ञ व्यवस्था गर्नुपर्ने, चिस्यान केन्द्र स्थापनामा पहल आवश्यक भएको, नगरभित्र पार्किङ र फुटपाथ पसलहरूको उचित व्यवस्थापन गर्नुपर्नेलगायतका सुझाव राखेका थिए । विशेष समयमा नगर सभासद् सिद्धिराम अवालले भने आफू कोरोना संक्रमित हुँदाको अनुभव सुनाएका थिए । नगरसभाको अर्को बैठक माघ ८ गते बिहीबार १ बजे बस्ने गरी स्थगित भएको छ ।