चलचित्र ‘लक्का-जवान’ को रिलिज स्थगित
<p>काठमाडौं। चलचित्र ‘लक्का-जवान’ को प्रदर्शन मिति स्थगित गरिएको छ।</p>
<p>२१ चैतबाट प्रदर्शनमा आउन लागेको चलचित्र ‘लक्का-जवान’ विश्वव्यापी महामारी बनेको कोभिड-१९ का कारण स्थगित गरिएको हो।</p>
<p>निर्माता किरण केसीले कोभिड-१९ को त्रासका कारण तोकिएको मिति स्थगित गरिएको बताए।</p>
<p>शिवहरी पौडेलको डेब्यू निर्देशनमा बनेको उक्त चलचित्र अब अर्को वर्षको भदौंमा रिलिज गर्ने गरी तयारी भइरहेको केसीको भनाइ छ।</p>
<p>“कोरोनाका कारण अहिले त्रास फैलिरहेको छ। सरकारले समेत सिनेमा हलमा नजान आग्रह गरेको अवस्थामा अब सर्नुको विकल्प भएन।” उनले <em>देखापढी</em>सँग भने।</p>
<p>केसीका अनुसार चलचित्र निर्माणदेखि प्रचार प्रसारसम्मका लागि अहिलेसम्म एक करोड ९१ लाख रूपैयाँ खर्च भएको छ। </p>
<p>‘लक्का–जवान’ दीलिप रायमाझी, प्रियंका कार्की, सलोन बस्नेत, वर्षा सिवाकोटी, किरण केसी, शिवहरी पौडेल, राजाराम पौडेल, सुशील पोखरेल, सरोज खनाललगायतका कलाकारको अभिनय छ।</p>
<p>पाका उमेरका व्यक्तिको दैनिक जीवनको कथामा तयार भएको चलचित्रको स्थगनको आधिकारिक घोषणा ७ चैतमा गर्ने तयारी छ।</p>
<p>कोरोना त्रासले हलमा दर्शकको संख्या घटेसँगै अहिले एकपछि अर्को नेपाली चलचित्र प्रदर्शन स्थगित हुन थालेका छन्।</p>
<p>३० फागुनमा प्रदर्शनमा आउने तयारीमा रहेकोे ‘म यस्तो गीत गाउँछु २’ र ७ चैतमा प्रदर्शनमा आउने तयारीमा रहेको ‘नीरफूल’ ले यसअघि नै प्रदर्शन मिति स्थगित गरेका छन्।</p>
प्रतिक्रिया दिनुहोस्
.jpg)
