Others

गृहपृष्ठ

कोभिड-१९: एनआरएनएले डेढ करोडको आवश्यक सामग्री सरकारलाई दिने काठमाडाैं। गैरआवासीय नेपाली संघ (एनआरएनए) ले कोभिड-१९ (कोरोना भाइरस) को रोकथाम र उपचारका लागि डेढ करोड बराबरको आवश्यक सामग्री नेपाल सरकारलाई हस्तान्तरण गर्ने भएको छ। संघका अध्यक्ष कुमार पन्तको अध्यक्षतामा हालै बसेको गैरआवासीय नेपाली संघ कार्यकारी (एनआरएनए आइइएस) को बैठकले कोभिड-१९ राहत कोषमा जम्मा भएको र उठ्दै गरेको रकमबाट एक करोड ६२ लाख नेपाली रूपैयाँ बराबरको सामग्री खरिद गरी  सरकारलाई हस्तान्तरण गर्ने निर्णय गरेको हो। उक्त सहयोग हस्तान्तरणपछि उठ्ने रकम भने विदेशमा नै बस्ने नेपालीको सहयोगका लागि राहतस्वरूप खर्च गरिने सङ्घले जनाएको छ। संघले कोरोना भाइरसको नियन्त्रण, रोकथाम तथा उपचारका लागि आवश्यक सहयोग गर्न विश्वभरका नेपालीमाझ आह्वान गर्दै आएको छ। बैठकले सङ्घ क्रियाशील सबै क्षेत्रमा कोभिड–१९ का विरुद्ध लड्न समिति बनाएर, नेपालीलाई सहयोग गर्न, भएका गतिविधि र घटनासमेत अपडेट गर्न क्षेत्रीय संयोजक (आरसी)लाई निर्देशन दिएको छ। यसैगरी नेपाल सरकारका विदेशस्थित रहेका मिसन, राजदूतावासका प्रतिनिधि रहने, सम्पूर्ण सङ्घ, संस्था र प्रतिष्ठित र सम्बन्धित व्यक्तिको समेत प्रतिनिधित्व हुने गरी समिति बनाउने निर्णयसमेत गरेको छ। सोही समितिले सहयोग र उद्धारका लागि काम गर्न नेपाल सरकारसँग प्रस्ताव गर्नेछ। यसका लागि पहल गर्न संघका अध्यक्ष पन्तलाई जिम्मेवारी दिएको संघका सूचना तथा सञ्चार उपसंयोजक कृष्ण केसीले जानकारी दिए। एनसीसी साइप्रसको नेपालीलाई राहत ‘प्याकेज’ यसैबीच गैरआवासीय नेपाली संघ, राष्ट्रिय समन्वय परिषद् (एनसीसी) साइप्रसले कोरोना भाइरसका कारण अप्ठयारोमा परेका त्यहाँ रहेका नेपालीलाई खाद्यान्नलगायत उपभोग्य वस्तुसहितको राहत ‘प्याकेज’ दिने भएको छ। विभिन्न पेशा व्यवसायको सिलसिलामा साइप्रसमा रहेका नेपालीलाई त्यहाँस्थित नेपाली नियोगको राेहबरमा राहत वितरण गर्न लागिएको उनले जानकारी दिए। कोरोना भाइरसको रोकथाम तथा निराकरणको लागि साइप्रसले आगामी १३ अप्रिलसम्मको लागि लकडाउन घोषणा गरेको छ। लकडाउनको अवस्थामा नेपाली कामदार र विद्यार्थीलाइ खाद्यान्नलगायतमा समस्या परेको सङ्घले जनाएको छ। एनआरएनए साइप्रसलगायत त्यहाँ रहेका स्थानीय संस्थाले अतिजोखिममा परेका विद्यार्थी तथा आयश्रोत नभएका नेपालीलाई लक्षित गर्दै राहत प्याकेजको घोषणा गरेको छ। राहत प्याकेज ८ अप्रिल तारिखबाटै वितरण गरिनेछ। राहत प्याकेजमा चामल, दाल, चाउमिन, आलु, प्याज, तेल, सोयाविनलगायत छन्। अतिजोखिममा परेका विद्यार्थीले गैरआवासीय नेपाली संघ राष्ट्रिय समन्वय परिषद साइप्रसको फेसबुक म्यासेन्जरमा आफ्नो सबै विवरण पेश गर्नु पर्नेछ। रासस