चिनियाँ सरकारको निर्देशनपछि सुचारु हुने प्रक्रियामा तातोपानी नाका
<p>काठमाडौं। चीनको केन्द्रीय सरकारले तत्काल सञ्चालनमा ल्याउन स्थानीय प्रशासनलाई निर्देशन दिएपछि वुहानमा महामारी शुरू भएयता बन्द भएको तातोपानी नाका खुल्ने भएको छ। </p>
<p>कोभिड–१९ महामारीसँग जुध्न नेपाललाई चाहिने अत्यावश्यक स्वास्थ्य तथा खाद्यान्नका सामग्री पठाउन नाका सञ्चालनमा ल्याउन चीन सरकारले निर्देशन दिएको हो।</p>
<p>उद्योग, वाणिज्य तथा आपूर्ति मन्त्रालयका अनुसार चीनले आफ्नो स्थानीय प्रशासनलाई उक्त निर्देशन दिएको हो।</p>
<p>वुहान शहरबाट कोभिड–१९ फैलिन शुरू भएपछि तीन महीना चीनले सबै अन्तर्राष्ट्रिय नाका बन्द गरेको थियो। </p>
<p>आफैंले बन्द गरेको नेपाल–चीन व्यापारिक नाका पुनः सञ्चालन गर्न चीन सरकारले नेपाललाई पटक÷पटक आग्रह गर्दै आएको थियो।</p>
<p>चीनमा महामारी नियन्त्रणमा आएपछि १२ चैतमा सरकारले चीनतर्फका व्यापारिक नाका सञ्चालनमा ल्याउने निर्णय गरिसकेको भए पनि तातोपानी नाका सुचारु भएको थिएन। </p>
<p>अहिले भने चीन सरकार नै अग्रसर भएर नाका सञ्चालन गर्न लागेको उद्योग, वाणिज्य तथा आपूर्ति मन्त्रालयले जानकारी दिएको छ।</p>
<p>वाणिज्य सचिव डा. बैकुण्ठ अर्यालले भने, “चीनले आफ्नो स्थानीय प्रशासनलाई नाका छिटो सञ्चालनमा ल्याउन निर्देशन दिइसकेको छ।”</p>
<p>तातोपानी नाकाका भन्सार प्रमुख लालबहादुर खत्रीले चीनतर्फको भन्सार सुचारु गर्न निर्देशन भइसकेको जानकारी पाएको बताए।</p>
<p>“सोही निर्देशनअनुसार चीनियाँ पक्षले स्थास्थ्य लगायत अन्य सामग्री नेपाल पठाउने योजना बनाइरहेका छन्”, उनले भने।</p>
<p>चीनियाँ टोलीले अबको केही दिनमा कार्य योजना बनाउने र नेपाललाई छलफलमा बोलाउने सम्भावना रहेको उनको भनाइ छ।</p>
<p>तातोपानी नाकाबाट सामान नेपाल ल्याउँदा दुवैतर्फका मानिसले एकअर्कालाई भने नभेट्ने रणनीति बन्ने सम्भावना रहेको छ।</p>
<p>उक्त रणनीतिअनुसार काम गर्दा सामान लिन चीन जाने नेपाली चालकले चीनियाँ कर्मचारी÷व्यवसायी भेट्न पर्नेछैन। यसरी काम गर्दा नेपाली नागरिक १४ दिन क्वारेन्टाइन बस्न नपर्ने बताइएको छ।</p>
<p>हाल चीनसँगको व्यापारिक नाका र नियमित हवाई उडान बन्द हुँदा नेपाललाई आवश्यक पर्ने स्वास्थ र खाद्यान्नका सामग्री आयात गर्न समस्या भइरहेको छ।</p>
<p>सडकमार्ग र हवाई उडान बन्द हुँदा चीनबाट प्लेन चार्टर्ड गरेर सामान ल्याउनपर्ने र त्यसरी सामान ल्याउँदा ३० प्रतिशतसम्म मँहगो गर्ने व्यवसायीहरूले बताएका छन्। </p>
<p><strong>पढ्नुहोस्</strong></p>
<p><a href="https://www.dekhapadhi.com/news/9896" target="_blank"><strong>चिनियाँ नाका खोल्न दबाब दिने व्यवसायी नाका खुलेपछि सम्पर्कमै आएनन्</strong></a></p>
प्रतिक्रिया दिनुहोस्
.jpg)
