भारतसँग सीमा जोडिएका प्रदेश १ का नाकामा सुरक्षाकर्मी थपिने
<p>इटहरी। कोरोना भाइरस संक्रमणको बढ्दो जोखिम नियन्त्रणका लागि प्रदेश १ का भारतसँगको नाकाको सुरक्षामा थप कडाई गरिने भएको छ।</p>
<p>भारतमा बिरामीको संख्या बढिरहेको बेला कोभिड-१९ भित्रिने सम्भावनाप्रति सावधानी अपनाउँदै आवागमन पूर्ण बन्द गराउन सीमामा सुरक्षा निगरानी बढाइने भएको हो।</p>
<p>मोरङ, सुनसरी र झापाका सुरक्षा निकायका प्रमुखहरूको बैठकले सीमा क्षेत्रमा हुने आवागमनलाई रोक्न र सीमाक्षेत्रमा निगरानी बढाउन सुरक्षाकर्मीको संख्या थप गर्ने निर्णय गरेको छ।</p>
<p>नाकामा हुने गतिविधिमा निगरानी बढाउने, भारतीय सुरक्षाकर्मीहरूसँगको समन्वयमा सूचनाहरू संकलन गरी आदानप्रदान गर्ने विषयमा छलफल भएको सुनसरी प्रहरी प्रमुख एसपी यज्ञविनोद पोखरेलले बताए।</p>
<p>सो छलफलमा तीनै जिल्लाका प्रमुख जिल्ला अधिकारी, जनपथ एवं सशस्त्र प्रहरी र राष्ट्रिय अनुसन्धान विभागका प्रमुख सहभागी थिए।</p>
प्रतिक्रिया दिनुहोस्
.jpg)
