बेलायत र जर्मन नागरिक घर लैजान आज दुई विमान काठमाडौं आउँदै
<p>काठमाडौं। लकडाउनका कारण अलपत्र परेका आफ्ना नागरिक स्वेदश फर्काउन बेलायत र जर्मनीले विमान चार्टर्ड गरेका छन्।</p>
<p>लकडाउनको अवधि बढेपछि यहाँ रहेका आफ्ना नागरिकलाई असहज नहोस् भनेर नेपालस्थित सम्बन्धित देशका दूतावासले एअरलिफ्टबाट उनीहरूलाई उद्धार गर्न लागेका हुन्।</p>
<p>नेपाल नागरिक उड्डयन प्राधिकरणका प्रवक्ता राजकुमार क्षेत्रीका अनुसार बेलायत र जर्मनी दूतावासले छुट्टाछुट्टै दुई विमान चार्टर्ड गरेका छन्।</p>
<p>कतार एअरवेजको ३३० फ्लाइट नम्बरको जहाजले जर्मन नागरिक लैजानेछ।</p>
<p>त्यस्तै बेलायतका नागरिकको उद्धार गर्न टाइटन एअरवेजको बोइङ ७६७-३६ एन जहाजले उडान भर्नेछ।</p>
<p>दुवै विमानले उडान अनुमति पाइसकेको प्रवक्ता क्षेत्रीले जानकारी दिए।</p>
<p>कतार एअरवेयजको जहाज बिहान ११ बजेर १५ मिनेटमा त्रिभुवन अन्तर्राष्‍ट्रिय विमानस्थल अवतरण गर्ने छ भने १२ बजेर १५ मिनेटमा प्रस्थान गर्नेछ।</p>
<p>बेलायती दुतावासले चार्टर्ड गरेको टाइटन एअरवेज १२ बजे अवतरण गर्नेछ र १ बजेर १५ मिनेटमा प्रस्थान गर्नेछ।</p>
<p>बेलायती दूतावासले २८ चैतका लागि पनि उक्त विमान चार्टर्ड गरेको छ।</p>
<p>यसअघि अमेरिका, फ्रान्स, अष्ट्रेलियालगायतका देशहरुले आफ्ना नागरिकलाई एअरलिफ्टबाट घर लगिसकेका छन्।</p>
<p>११ चैतमा लकडाउन भएयता अहिलेसम्म उद्धारका लागि १६ वटा अन्‍तर्राष्‍ट्रिय उडान भएका छन्।</p>
<p>पर्यटन बोर्डका अनुसार लकडाउन भएदेखि ५ अप्रिलसम्म झण्डै एक हजार ६ सय विदेशी नागरिक स्वदेश फर्किएका छन्।</p>
प्रतिक्रिया दिनुहोस्
.jpg)
