'वडा अध्यक्षको गाडीमा भेटिएको बन्दुक वैध भएपनि लकडाउनको बेला बोक्न नपाइने'
<p>कैलाली। वडा अध्यक्षको भारतीय नम्बरको गाडीबाट बन्दुक भेटिएको विषयमा कंचनपुरका सुरक्षा अधिकारीहरूले वैध भन्दैमा लकडाउनको समयमा हतियार बोक्ने अधिकार नभएको बताएका छन्।</p>
<p>हिजो, कैलाली गोदावरी नगरपालिका १० का वडा अध्यक्ष रविन्द्र शाहीले प्रयोग गर्दै आएको डिएल-३ सिसिआर ३९९७ को भारतीय गाडी, एक थान राईफल, त्यसमा प्रयोग हुने १४ गोली, एक थान एअरगन र त्यसमा प्रयोग हुने १९६ छर्रासहित कंचनपुरको कृष्णनगर नगरपालिकाबाट सशस्त्र प्रहरीले बरामद गरेको थियो। </p>
<p>वडा अध्यक्ष शाहीलाई भने पक्राउ गरिएको छैन।</p>
<p>सशस्त्र प्रहरी बल नेपाल नम्बर ३५ गणका प्रमुख सशस्त्र प्रहरी उपरीक्षक बिरबहादुर साहुले इजाजतपत्र हतियार भए पनि खुलेआम बोकेर हिड्ने अधिकार सुरक्षाकर्मीलाई मात्र भएको बताए।</p>
<p>कंचनपुरका प्रमुख जिल्ला अधिकारी नुरहरी खतिवडाले पनि लकडाउनमा भारतीय नम्वरको गाडी सञ्चालनमै रोक लगाएको बताएका छन्।</p>
<p>उनले भने, "सरकारले एक स्थानीय तहबाट अर्को स्थानीय तहमा जान रोक लगाएको बेला अर्को जिल्लामा आएर हतियार बैध नै भए पनि बोक्ने अधिकार कसैलाई नभएको जानकारी दिए।</p>
<p>वडाअध्यक्ष शाहीले भने आफुसँग दुवै हतियारको इजाजत पत्र रहेको बताएका छन्।</p>
<p>उनले आफू पीपीई लिन गएको बेला प्रहरीले भारतीय नम्बरको गाडी देखेर चेकजाँच गरेको बताउदै हतियार बैध बताउँदा बताउँदै गाडी र हतियार लिएर गएको गुनासो गरे।</p>
<p>"लकडाउनको बेला हतियार बोक्न नपाइने मलाई जानकारी भएन, पहिले देखि नै भारतीय नम्बर प्लेटको गाडी प्रयोग गर्दै आएको थिएँ", उनले भने।</p>
प्रतिक्रिया दिनुहोस्
.jpg)
