बसन्तपुरमा लकडाउनको बिहानः कोही मर्निङ वाकमा, कोही फुटपाथ पसलमा (भिडिओसहित)
<p>काठमाडौं। बिहानको समय। लकडाउनको काठमाडौं। बाटो सुनसान नै हुनुपर्थ्यो तर त्यस्तो थिएन।</p>
<p>अन्दाजी ६० वर्षका एक बृद्ध हतारिँदै हिँडिरहेका थिए, मानौं उनलाई कुनै गन्तव्यमा पुग्न हतार भइरहेथ्यो। मुखमा मास्क त थियो। तर, मास्कले उनको मुखभन्दा चिउँडो ढाकिरहेथ्यो।</p>
<p>नजिकै रहेका प्रहरीले भनिहाले, “ए, बिहान-बिहानै मर्निङ वाकमा निस्किएको ?”</p>
<p>“मर्निङ वाक होइन, घरमा बस्दा बस्दै दिक्क लागेर यसो फ्रेस हुन बाहिर आएको”, उनले जवाफ दिए।</p>
<p>उनी मात्र होइन, बिहान पाँच बजे नै बसन्तपुर दरबार क्षेत्रमा सयौंको संख्यामा मानिसहरू सडकमा निस्फिक्री हिँडिरहेका थिए।</p>
<p>उनीहरूमध्ये कोही तरकारी, दूध, खाद्यान्न लगायतका अत्यावश्यक वस्तु किनबेच गरिरहेका थिए। कोही मर्निङ वाकमा हिँडिरहेका थिए।</p>
<p><img alt="" height="540" src="https://www.dekhapadhi.com/storage/photos/shares/COVID-19/lock down/new s.00_06_04_02.Still034.jpg" width="960" /></p>
<p>छेवैमा प्रहरीहरू सुपरिवेक्षणमा खटिएका थिए। हातमा सामान नभएका व्यक्तिलाई दुई घण्टा नियन्त्रणमा लिएर सम्झाई बुझाई गरी छोड्ने गरेको महानगरीय प्रहरी वृत्त जनसेवाका प्रमुख, डिएसपी सुनिलजंग शाहले जानकारी दिए।</p>
<p>“बिहान बेलुका भिडभाड नगर्ने गरी खाद्यान्न, तरकारीलगायत अत्यावश्यक वस्तुका पसलमा त्यति धेरै कडाइ गरिएको छैन”, डीएसपी शाहले भने।</p>
<p>जति सम्झाई-बुझाई गरे पनि कुनै काम नभएर पनि घर बाहिर निस्किनेको संख्या बढिरहेको उनको गुनासो छ।</p>
<p>प्रहरीले आफ्नो तर्फबाट घरघरमा जनचेतना जगाउने, बेला बेला गस्ति गर्ने गरे पनि प्रहरी आउँदा भित्र पसेजस्तो गर्ने र अन्य बेला सडकमा घुमिरहने गरेको भन्दै त्यस्ताका लागि कडा कारवाहीको विकल्प नभएको उनको भनाई छ।</p>
<p><strong>फुटपाथ पसल पनि निर्वाध खुला</strong></p>
<p>१० वर्षदेखि बसन्तपुरमा तरकारी बेच्दै आएकी काभ्रेकी ५५ वर्षीय रिता थापाको व्यवसाय लकडाउन लगत्तै रोकिएको थियो।</p>
<p>तर, दुई दिनदेखि उनले फेरि फुटपाथमा तरकारी बेच्न थालेकी छन्।</p>
<p>“अरुले पसल खोलेर व्यापार गरिरहेका थिए। त्यही भएर मैले पनि खोलेँ। आज मात्रै एक हजार रुपैयाँ जतिको तरकारी बेचियो”,उनले भनिन्।</p>
<p>बिहान बेलुका तरकारी पसल, दुग्धजन्य पदार्थका पसल लगायतका अत्यावश्यक सामानको किनबेच गर्न छुट दिए पनि धेरै भीडभाड नगरेर सामाजिक दूरी कायम गर्न प्रहरीले अनुरोध गर्दै आएको छ।</p>
<p><img alt="" height="540" src="https://www.dekhapadhi.com/storage/photos/shares/COVID-19/lock down/morning walk lock down 1.jpg" width="960" /></p>
<p>तर, बसन्तपुर दरबार क्षेत्रका पसलहरूमा कुनै सामाजिक दूरी कायम गरेको देखिएन।</p>
<p>कतिसम्म भने ब्युटी पार्लर अगाडि तरकारी बेचेको पनि पाइयो।</p>
<p>प्रश्न सोध्दा जवाफ थियो, “अहिले तरकारीबाट राम्रो आम्दानी भइरहेको छ। अरु पसल त खोल्न पनि पाइएको छैन्। दुईचार पैसाका लागि भए पनि आफ्नो पसलकै अगाडि तरकारी बेचिरहेका छौं।”</p>
<p><iframe frameborder="0" height="550" scrolling="no" src="https://www.youtube.com/embed/CMJsYrz2kcA" width="790"></iframe></p>
प्रतिक्रिया दिनुहोस्
.jpg)
