आपूर्तिमन्त्रीलाई व्यवसायीको ब्रिफिङ- ‘खाद्यान्न प्रशस्त मौज्दात छ, चिन्ता लिनु पर्दैन’
<p>काठमाडौं। लकडाउनपछि नेपाली बजारमा खाद्यान्‍नको कुनै समस्या नभएको खाद्य किराना व्यवसायीहरूले बताएका छन्।</p>
<p>आज उद्योग, वाणिज्य तथा आपूर्तिमन्त्री लेखराज भट्टसँगको भेटमा व्यवसायीहरूले २५/३० दिन पुग्ने खाद्यान्न मौज्दात रहेको जानकारी गराएका हुन्।</p>
<p>दैनिक उपभोग्य सामानको मौज्दातको अवस्था बुझ्‍न नेपाल खाद्य किराना व्यवसायी संघमा पुगेका मन्त्रीलाई अध्यक्ष देवेन्द्रभक्त श्रेष्ठले खाद्यान्नको आपूर्तिमा कुनै समस्या नभएको भनी आश्‍वस्त पारेका छन्।</p>
<p>भारतबाट नियमित रूपमा दैनिक उपभोग्य वस्तुको आयात भइरहेकोले उपभोक्ताको माग बमोजिम नै पुर्‍याउन सकिने उनले बताएका छन्।</p>
<p>तराईमा रहेका दाल, चामल उद्योगमा पनि प्रशस्त भण्डारण रहेकाले अभाव नहुने संघले जनाएको छ।</p>
<p>तर, भारतबाट दैनिक भइरहेको आयातमा अवरोध भएमा भने बजारमा अभाव हुन सक्ने भन्दै त्यसतर्फ भने ध्यान दिन मन्त्रीको ध्यानाकर्षण गराएका छन्।</p>
<p>मन्त्री भट्टले व्यवसायीरूसँग सामानको ढुवानी र आपूर्ति सहज बनाउन मन्त्रालय लागिरहेको बताएका छन्।</p>
<p>उनले खाद्यान्न आयात गर्ने सवारीलाई पासको व्यवस्था गर्न लागेको जानकारी दिए।</p>
<p>संकटको यो बेला सहयोग गर्न आग्रह गर्दै व्यवसायीको साथ र सहयोगको मूल्यांकन सरकार र जनताले गर्ने बताएका छन्।</p>
प्रतिक्रिया दिनुहोस्
.jpg)
