कोभिड-१९ नियन्त्रणका लागि म्यादी प्रहरी भर्ना गर्दै भोजपुरको हतुवागढी गाउँपालिका
<p>भोजपुर। कोरोना भाइरसको संक्रमण फैलिन नदिन गरिएको लकडाउनलाई कडाईको साथ पालना गराउन भोजपुरको हतुवागढी गाउँपालिकाले म्यादी प्रहरी भर्ना प्रक्रिया शुरू गरेको छ।</p>
<p>गाउँपालिकाले सार्वजनिक सूचना निकालेर यसअघि निर्वाचनमा खटिएका तथा सेना प्रहरीबाट पेन्सनमा निस्किएकाहरूका लागि दरखास्त आव्हान गरेको छ। </p>
<p>उनीहरूलाई गाउँपालिका आफैँले पारिश्रमिक दिनेछ।</p>
<p>गाउँपालिकाको हिजो, २५ चैतमा बसेको बैठकले गाउँपालिका छिर्ने नाकामा सावधानी अपनाउँदै सतर्कता बढाउन म्यादी प्रहरी नियुक्त गर्ने निर्णय गरिएको अध्यक्ष प्रेमकुमार राईले <em>देखापढी</em>लाई बताए।</p>
<p>उनका अनुसार तराई र धनकुटाबाट गाउँपालिका छिर्ने सुनबालुवा, लामीबगर, भँगालेटार, मचुवा, सिम्ले र चुहार नाकामा म्यादी प्रहरी परिचालन गर्न लागिएको छ।</p>
<p>पछिल्लो समय कैलालीमा एकजनामा कोभिड-१९ लोकल केससमेत देखिएपछि सरकारले २२ चैतदेखि एक स्थानीय तहबाट अर्को स्थानीय तह, जिल्ला-जिल्ला र एक प्रदेशबाट अर्को प्रदेशमासमेत आवागमन बन्द गरेको छ।</p>
<p>यही निर्णयलाई पालना गराउन आफ्नो क्षेत्रमा पर्याप्त जनशक्तिमा सुरक्षाकर्मी नभएकोले जिल्ला प्रशासन कार्यालयसँग स्वाकृती लिएर म्यादी प्रहरी भर्ना प्रक्रिया थालिएको गाउँपालिकाले जनाएको छ।</p>
प्रतिक्रिया दिनुहोस्
.jpg)
