भायनेटको सिस्टममा साइबर हमला, ग्राहकको विवरण ह्याकरको पहुँचमा
<p>काठमाडौं। इन्टरनेट सेवा प्रदायक कम्पनी भायनेट कम्युनिकेशन प्रालिकोे सिस्टममा साइबर हमला भएको छ। </p>
<p>ह्याकरले भायनेटको सिस्टम ब्रिज गरेर ग्राहकको नाम, नम्बर र ठेगाना कपी गरेको छ।</p>
<p>आज भायनेटको सिस्टम ह्याक भएको कम्पनीका प्रबन्ध निर्देशक विनय बोहोराले बताए। </p>
<p>उनले भने, “कसैले सिस्टम ब्रिज गरेर ग्राहको नाम, फोन नम्बर र इमेल ठेगाना निकालेको रहेछ। सेक्युरेटी जाँच गरेर कमजोरी पत्ता लगायौ र अहिले समाधान गरिसक्यौं।”</p>
<p>सिस्टम ह्याक भएको कारण नियमित सेवामा कुनै अवरोध नआएको उनले बताए। </p>
<p>“ह्याकरले कुनै क्षति गरेको पाइएन तर, दुःख दिनको लागि मात्रै ग्राहकको विवरण सिस्टममा अगाडि ल्याएर राखिदिएको रहेछ”, बोहोराले भने, “कसले ह्याक गर्‍याे भन्ने बारेमा खोजी गर्न प्रहरीमा भनेका छौं।”</p>
<p>गत २५ फागुनमा फुडमाण्डुको वेबसाइट पनि ह्याक भएको थियो। अनलाइनमार्फत खाना तथा खाजा डेलिभरी गर्ने कम्पनीको वेबसाइट ह्याक गरेर ग्राहकको विवरण चोरी भएको थियो।</p>
<p>अनलाइन सेवा प्रदायक कम्पनीमार्फत ग्राहकको विवरण चोरी हुँदा ती कम्पनीका ग्राहकको व्यक्तिगत सुरक्षामा चुनौति थपिन्छ। </p>
प्रतिक्रिया दिनुहोस्
.jpg)
