सुदूरपश्चिम प्रदेशः स्वास्थ्यकर्मी, सुरक्षाकर्मी र सञ्चारकर्मीलाई १५ लाखकाे बीमा
<p>कैलाली। सुदूरपश्चिम प्रदेश सरकारले सुदूरपश्चिममा कार्यरत स्वास्थ्यकर्मी, सुरक्षाकर्मी र सञ्चारकर्मीलाई १५ लाखकाे बीमाकाे व्यवस्था गर्ने निर्णय गरेकाे छ।</p>
<p>आज बसेकाे सुदूरपश्चिम प्रदेश मन्त्रिपरिषद्को बैठकले स्वास्थ्यकर्मी र सुरक्षाकर्मीकाे हकमा थप १५ लाखकाे बीमा गर्ने निर्णय गरेकाे हाे। यसअघि संघीय सरकारले उनीहरूलाई २५ लाखकाे बीमाकाे व्यवस्था गर्ने निर्णय गरिसकेकाे छ।</p>
<p>यस्तै मन्त्रिपरिषद्काे बैठकले अतिविपन्न , असहाय र ज्यालादारी मजदुरका परिवारका लागि तीन हजारका दरले १६ करोड रूपैयाँ स्थानीय तहमार्फत् राहत सहयोग गर्ने निर्णय गरेकाे प्रदेश सरकारका प्रवक्ता तथा आन्तरिक मामिला तथा कानून मन्त्री प्रकाश शाहले जानकारी दिए। </p>
<p>उनका अनुसार सुदूरपश्चिम प्रदेशका ९ वटै जिल्ला अस्पतालका लागि २० वटा भेन्टिलेटर खरिद गर्ने, सबै जिल्ला प्रशासन कार्यालयलाई पाँच लाखका दरले तथा नेपाली सेना, नेपाल प्रहरी र सशस्त्र प्रहरीका लागि १५ लाखका दरले रकम उपलब्ध गराउने निर्णय गरिएकाे छ।</p>
<p>प्रदेश सरकारले कोभिड-१९ उपचार कोष सञ्चालन निर्देशिका र राहत वितरण मापदण्डसमेत बैठकले पारित गरेको बताउँदै मन्त्री शाहले प्रदेशमा फागुन मसान्तसम्म तिर्नुपर्ने कर, शुल्क र दस्तुरको अवधि वैशाख मसान्तसम्म थप गर्ने निर्णय भएको जानकारी दिए।</p>
प्रतिक्रिया दिनुहोस्
.jpg)
