चितवनमा अनलाइन कक्षा सञ्चालन गर्दै विद्यालय
<p>चितवन। लकडाउनको समयमा विद्यार्थीहरू घरमा नपढेपछि चितवनमा रहेका विद्यालयले विद्यार्थीलाई केन्द्रित गर्दै अनलाइन कक्षा सञ्चालन गरेका छन्।</p>
<p>शिक्षा विकास तथा समन्वय एकाइ चितवनका प्रमुख भूमिलाल सुवेदीका अनुसार जिल्लामा एसईई परीक्षा दिने तयारीमा २२४ विद्यालयका ११ हजार २५४ विद्यार्थी छन् ।</p>
<p>विद्यार्थी र शिक्षकको समय मिलाएर हरेक दिन कुनै एक समयमा अनलाइन कक्षा सञ्चालन भइरहेको उनले जानकारी दिए। एक दिन एउटा विषयको पढाइ हुने गरेको सुवेदीकाे भनाइ छ।</p>
<p>“लकडाउनको समयमा विद्यार्थी घरमा पढ्न नमानेको गुनासो आउन थालेपछि विद्यालयले अनलाइन कक्षा सञ्चालन गरेका हुन्”, अनलाइन कक्षा सञ्चालनका लागि एपमार्फत् विद्यार्थीलाई जोडेर पढाइने गरिएको छ।</p>
<p>अझै पनि केही विद्यार्थी सो एपभन्दा बाहिर रहेका कारण उनीहरूलाई पनि सम्पर्कमा ल्याउन खोजिएको सुवेदी बताउँछन्।</p>
<p>लकडाउनको समयभर विद्यार्थीलाई शिक्षकले फोनमार्फत् निगरानी गरिरहेको उनको भनाइ छ।</p>
<p>“इन्टरनेटको सुविधा भएका स्थानमा अनलाइन कक्षा सञ्चालन गरिएको छ भने अन्य स्थानमा मोबाइलबाट निगरानी गरिएकोछ”, उनले भने।</p>
<p>विद्यार्थी परीक्षाको तयारीबाट बिचलित नहुन् भनेर विद्यालयले शिक्षकलाई यसको जिम्मेवारी दिएको सुवेदीले बताए। लकडाउनको समयमा विद्यार्थीले पढे/नपढेको बुझ्नका लागि अभिभावकसँग पनि नियमित सम्पर्क बढाउन लगाइएको छ। <em>रासस</em></p>
प्रतिक्रिया दिनुहोस्
.jpg)
