कोभिड-१९ सँग जुध्ने तयारीबारे छलफल गर्न प्रधानमन्त्रीले मुख्यमन्त्रीहरूसँग भिडिओ कन्फ्रेन्स गर्दै
<p>काठमाडौं। प्रधानमन्त्री केपी शर्मा ओलीले आज सातवटै प्रदेशका मुख्यमन्त्रीहरूसँग भिडिओ कन्फ्रेन्स गर्ने भएका छन्।</p>
<p>बिहान ११ बजे सिंहदरबारस्थित एक्सन रुमबाट भिडिओ कन्फ्रेन्स तय गरिएको प्रधानमन्त्रीका प्रेस सल्लाहकार सूर्य थापाले <em>देखापढी</em>लाई बताए।</p>
<p>थापाका अनुसार कन्फ्रेन्स कोभिड-१९ को रोकथाम, उपचारमा भइरहेका काम र तयारीमा केन्द्रित हुनेछ।</p>
<p>कोभिड-१९ सँग जुध्‍न अन्तरप्रदेश र संघसँगको समन्वय पनि भिडिओ कन्फ्रेन्सको मुख्य अजेण्डा रहेको छ।</p>
<p>मुख्यमन्त्रीहरूले कोरोना भाइरस संक्रमणबाट बच्‍न प्रदेश सरकारले गरिरहेका कामको रिपोर्टिङ गर्नेछन्।</p>
<p>कोरोना भाइरसको संक्रमण फैलिन नदिन ११ चैतदेखि जारी लकडाउन दोस्रो पटक अवधि बढाएर ३ वैशाखसम्म लम्ब्याइएको छ।</p>
<p>दुई दिनअघि सरकारले उपत्यकामा डेरा गरेर बसेका तर लकडाउनका कारण घर फर्किन नपाएकाहरूलाई घर फर्काउन गरेको निर्णय प्रदेश सरकारले असहमति जनाएका कारण फिर्ता लिएको थियो।</p>
प्रतिक्रिया दिनुहोस्
.jpg)
