गण्डकी प्रदेशमा विदेशबाट आएकाहरूको र्यापिड टेष्ट थालियो
<p>कास्की। गण्डकी प्रदेशमा विदेशबाट आएकाहरूको कोभिड-१९ को र्‍यापिड डाइगोनिष्टक टेष्ट (आरडिटी) शुरु भएको छ।</p>
<p>र्‍यापिड टेष्टका लागि पाँच हजार थान किट प्राप्त भएकाले प्रदेशका नौ जिल्लामा परीक्षण शुरु भएको प्रदेश स्वास्थ्य निर्देशनालयका निर्देशक डा. विनोदविन्दु शर्माले बताए ।</p>
<p>कास्कीमा पनि रुपा गाउँपालिकाबाट परीक्षण थालिएको छ।</p>
<p>रुपाका दुई वडाका आठ जनाको परीक्षण गरिएकोमा सबैको नतिजा नेगेटिभ आएको जिल्ला स्वास्थ्य कार्यालयका प्रमुख बाबुराम आचार्यले बताए।</p>
<p>लकडाउन जारी हुनुअघि विदेशबाट आएका सबैको कोभिड-१९ को संक्रमण छ/छ छैन जान्‍नका लागि परीक्षण शुरू गरिएको आचार्यले जानकारी दिएका छन्।</p>
<p>आरडिटी किटमार्फत कोरोना परीक्षण गर्दा १५ मिनेटमै नतिजा आउने बताइएको छ।</p>
<p>त्यस्तै पोखरा महानगरपालिकाभित्र परीक्षण मापदण्डमा परेका ३८८ जनामा सीमित मात्रामा किट आएकाले परीक्षण शुरु गर्न अन्योल भएको स्वास्थ्य महाशाखाका अधिकृत हरिलाल आचार्यले बताएका छन्।</p>
<p>महानगरलाई २४० थान मात्र किट प्राप्त भएकाले सबैको परीक्षण गर्न कठिनाइ हुने भएपछि परीक्षण गर्नुपर्नेहरूको विस्तृत विवरण भेरिफाइ गरी नमूना संकलन गरिनेछ। <em>रासस</em></p>
प्रतिक्रिया दिनुहोस्
.jpg)
