टेकु अस्पतालमा उपचाररत् दुईजना कोभिड-१९ का बिरामी केही दिनमै डिस्चार्ज हुँदै
<p>काठमाडौं। टेकुस्थित शुक्रराज ट्रपिकल तथा सरुवा रोग अस्पतालको आइसोलेसन कक्षमा उपचार गराइरहेका कोभिड-१९ का दुईजना बिरामी स्वास्थ्यमा सुधार आएकोले केही दिनमै डिस्चार्ज हुने अस्पतालले जनाएको छ।</p>
<p>उनीहरूको स्वास्थ्य अवस्था सामान्य रहेको र आवश्यक स्वास्थ्य परीक्षण पूरा गरेपछि छिट्टै डिस्चार्ज हुने अस्पतालका निर्देशक डा. सागर राजभण्डारीले बताए।</p>
<p>उनले भने, “अस्पतालमा उपचारको क्रममा रहेका कोभिड सङ्क्रमित दुवै जनाको स्वास्थ्य अवस्था सामान्य छ । दुई दिनभित्र अन्तिम रिपोर्ट आउनेछ, त्यो रिपोर्ट नेगेटिभ देखिएमा डिस्चार्ज गरिनेछ ।”</p>
<p>अस्पतालमा अहिले कोभिड-१९ पोजेटिभ दुईजनासहित शंकास्पद सात गरी कूल नौ जनाको उपचार भइरहेको छ।</p>
<p>निर्देशक डा राजभण्डारीले अस्पतालमा जनशक्ति तथा उपकरणको कमी नभएको बताएका छन्।</p>
<p>“अस्पतालमा अहिले पहिलाभन्दा बिरामीको चाप कम छ। क्षयरोगलगायत अन्य सरुवा रोगका बिरामीलाई अन्यत्रै सिफारिस गरिएको हुनाले कोभिडको उपचारमा सहजता आएको छ”, उनले भने।</p>
<p>नेपालमा हालसम्म नौ जनामा कोभिड-१९ देखिएको छ। एक जना उपचारपछि घर फर्किसकेका छन् ।</p>
<p>नेपालमा दोस्रोपटक १० चैतमा कोभिडको दोस्रो बिरामी फेला परेको थियो।</p>
<p>४ चैतमा कतार एअरवेजको जहाजमार्फत फ्रान्सबाट कतार हुँदै नेपाल आएकी १९ वर्षीया युवतीमा कोभिड-१९ पोजेटिभ देखिएको थियो।</p>
<p>त्यस्तै १२ चैतमा धादिङका एकजना पुरुषमामा कोभिड पोजेटिभ देखिएको थियो ।</p>
<p>उनीहरू दुईजनाको टेकु अस्पतालमा उपचार भइरहेको छ।</p>
<p>त्यस्तै धौलागिरी अस्पतालमा दुई र सेती प्रादेशिक अस्पतालमा चारजना कोभिड-१९ का बिरामी उपचाररत् छन्। <em>रासस</em></p>
प्रतिक्रिया दिनुहोस्
.jpg)
