प्यूठानबाट पाँच दिन पैदल हिंडेर जुम्ला
<p>जुम्ला। लकडाउन हुनुअघि मजदुरीका लागि प्यूठानमा गएका जुम्ला र कालीकोटका युवा पाँच दिनको पैदल यात्रापछि जुम्ला आइपुगेका छन्।</p>
<p>कोरोना भाइरसको त्रासपछि देशमा लकडाउन भएर ज्याला मजदुरी बन्द भएपछि उनीहरू पैदल यात्रा गरेरै जुम्ला आइपुगेका हुन्।</p>
<p>हिमा गाउँपालिका-६, महाबै पाथरखोलाका तुलराज अधिकारीले मजदुरीका लागि प्यूठान जिल्ला पुगेको बेलामा देश लकडाउन भएको र कामविहीन भएर आर्थिक सङ्कटमा परेपछि रोल्पा हुँदै रुकुम, जाजरकोट भएर पाँच दिनमा जुम्ला पुगेको बताए।</p>
<p>यसैगरी, हर्क तिरुवाले लकडाउन खुल्ने मिति निश्चित नभएपछि बरू घरमै बसौँला भनेर चाउचाउ, बिस्कुट र पानीको भरमा दिनरात हिँडेर जुम्ला पुगेको सुनाए। कालीकोट जिल्लाका ९ जना र जुम्लाका चार जना गरी १३ जनाको भौतिक संरचना निर्माणको जिम्मेवारी थियो। “लकडाउनले काम पनि नहुने र भएका पैसा पनि सकिएपछि रातारात गरी आफ्नो जिल्ला आउनुपर्ने बाध्यता भयो”, तिरुवाले भने।</p>
<p>प्रहरी नायव उपरीक्षक लालबहादुर धामीका अनुसार प्यूठानबाट जुम्ला र कालीकोटका स्थानीय युवा भागेर आएको जानकारी प्राप्त भएपछि कालीकोट तिलागुफा नगरपालिकाका चारजना, पलाता गाउँपालिकाका पाँचजना र जुम्ला हिमा गाउँपालिका–६, महाबै पाथरखोलाका चार युवालाई नाग्म हेल्थ डेस्कमा जाँच गरी १४ दिनसम्मका लागि क्वारेन्टाइनमा राखिएको छ।</p>
<p>यसैबीच जुम्ला-कालीकोटको सिमाना जोड्ने पक्की पुल निर्माण गर्न आएका बर्दियाका ९ मजदुर अलपत्र परेका छन्।</p>
<p>जुम्ला घर भएका मजदुर जयधुननाथ योगीका अनुसार समयमै घर फर्कन नसक्दा बर्दियाका कामदार अलपत्र परेका हुन्। कामको सिलसिलामा सुर्खेत गएका ठेकेदार लकडाउनका कारण फर्कन नसकेको पनि उनले बताए।</p>
<p>समस्यामा परेका मजदुरलाई तिला गाउँपालिकाले तत्काल ९० किलाे चामल, ३० किलाे दाल, ३५ किलाे आलु, १५ पाकेट नुन र दुई पेटी तेल उपलब्ध गराएको छ। घर फर्काइदिन अनुरोध गरेका मजदुरलाई गाउँपालिका उपाध्यक्ष विष्णु बुढाले तत्काल घर पठाउन सकिने अवस्था नभएकोले जुम्लामै ढुक्कसँग बस्न आग्रह गरिन्। <em>रासस</em></p>
प्रतिक्रिया दिनुहोस्
.jpg)
