बागलुङकाे स्थानीय तहमै पुगेर काेभिड-१९ जाँच
<p>बागलुङ। स्थानीय तहमै कोभिड-१९को द्रुत जाँच (र्‍यापिड टेष्ट) भइरहेको छ।</p>
<p>अबकाे दुई दिनसम्ममा बालगुङका १० वटै स्थानीय तहका शङ्कास्पद ९७१ जनामा कोरोना भाइरसको द्रुत जाँच गरिनेछ।</p>
<p>संक्रमितसँग सम्पर्क भएका र विदेशबाट आएका सबैमा कोरोना भाइरस जाँच गरिने स्वास्थ्य कार्यालय बागलुङले जनाएको छ। द्रुत जाँचका लागि जिल्लाभर स्वास्थ्य प्राविधिक खटिएका छन्।</p>
<p>हिजाे, २८ चैतमा ९४ जनामा जाँच गरिएकामा सबैको रिपोर्ट नेगेटिभ आएको जनाइए पनि त्यसको विस्तृत जानकारी स्वास्थ्य मन्त्रालयले गराउनेछ। तीमध्ये बागलुङ नगरपालिकाका २८ जना, बडिगाड गाउँपालिकाका ५९ र तमानखोला गाउँपालिकाका सातजनामा कोरोना भाइरसकाे जाँच गरिएको थियो।</p>
<p>कार्यालय प्रमुख सुरज गुरौका अनुसार बागलुङ नगरपालिकामा कूल १९२, ढोरपाटन नगरपालिका र तमानखोला गाउँपालिकामा ७८, बरेङ गाउँपालिकामा ५६, जैमिनी नगरपालिकामा ८६, निसीखोला गाउँपालिकामा १०३, काठेखोला गाउँपालिकामा ५६, बडिगाड गाउँपालिकामा १६१, गलकोट नगरपालिकामा १२८ र ताराखोला गाउँपालिकामा ३३ जनामा कोरोना भाइरसकाे जाँच गरिनेछ।</p>
<p>“र्‍यापिड टेष्टका लागि जिल्लाभर स्वास्थ्यकर्मीको चार टोली परिचालित छ”, उनले भने, “स्थानीय तहसँगको समन्वयमा जाँचको काम भइरहेको छ।” स्थानीय तहले निर्माण गरेका ‘क्वारेन्टाइन’ स्थलमा बोलाएर शङ्कास्पद व्यक्तिमा कोरोना जाँच्ने गरिएको छ।</p>
<p>ढोरपाटन, बडिगाड, तमानखोला र निसीखोलामा हिजाेदेखि शुरू भएको द्रुत जाँच आज सकिँदैछ। बागलुङ, काठेखोला, गलकोट, जैमिनी र ताराखोलामा भाेलिसम्ममा शङ्कास्पद सबैको जाँच गरिनेछ। बरेङमा भाेलि र पर्सि जाँच हुने भएको छ।</p>
<p>किटको प्रयोग गरेर गरिने र्‍यापिड टेष्टको रिपोर्ट १५ मिनेटमै आउने गरेको छ। पोजिटिभ रिपोर्ट आएमा पुनः स्वाबसमेत सङ्कलन गरेर थप पुष्टिका लागि पोखरास्थित प्रादेशिक जनस्वास्थ्य प्रयोगशालामा पठाइनेछ।</p>
<p>यसअघि स्वास्थ्य मन्त्रालयअन्तर्गतको इपिडिमियोलोजी तथा रोग नियन्त्रण महाशाखाको टोलीले २७ चैतमा बागलुङका स्वास्थ्य प्राविधिकलाई र्‍यापिड टेष्टसम्बन्धी प्रयोगात्मक अभिमुखीकरण प्रदान गरेको थियो।</p>
<p>सरकारले दुईजना संक्रमित भेटिएसँगै बागलुङलाई कोभिड-१९ को जोखिमयुक्त जिल्ला किटान गरी र्‍यापिड टेष्ट गर्ने निर्णय गरेको थियो। कोरोना भाइरसबाट संक्रमित बागलुङ नगरपालिका-४ की १९ वर्षीया युवती र वडा नं. ३ की ६५ वर्षीया महिला अहिले धवलागिरि अञ्चल अस्पतालमा उपचाररत छन्।</p>
<p>दुवैको स्वास्थ्य अवस्था भने सामान्य रहेको अस्पतालले जनाएको छ। युवतीमा १५ चैत र महिलामा २० चैतमा कोरोना संक्रमण पुष्टि भएको थियो। दुवै बेल्जियमबाट दोहा हुँदै कतार एअरको विमानबाट ४ चैतमा नेपाल आएका थिए।</p>
<p>यसैबीच ६५ वर्षीया महिलामा गरिएको कोरोना भाइरसको दोस्रो परीक्षण रिपोर्ट पनि पोजिटिभ आएको अस्पतालले जनाएको छ। यसअघि १९ वर्षीया युवतीमा गरिएको दोस्रो परीक्षणमा पनि पोजिटिभ रिपोर्ट आएको थियो।</p>
<p>लगातार दुईपटक कोराना भाइरसको नेगेटिभ रिपोर्ट आएपछि मात्र बिरामीलाई अस्पतालबाट घर पठाइने चिकित्सकले बताएका छन्। <em>रासस</em></p>
प्रतिक्रिया दिनुहोस्
.jpg)
