लकडाउनले सुनसान बाँके र बर्दियाका हाेमस्टे
<p>काठमाडाैं। कोरोना भाइरस संक्रमण नियन्त्रणका लागि सरकारले गरेको लकडाउनका कारण अहिले बाँके र बर्दियामा रहेका घरवास (हाेमस्टे) सुनसान छन्।</p>
<p>दुवै जिल्लाको राष्ट्रिय निकुञ्ज क्षेत्रमा खोलिएका घरबास पर्यटकको अभावमा सुनसान भएका हुन्।</p>
<p>बर्दियाका गुलरिया र ठाकुरद्वारा पर्यटनलाई आधार बनाएर खुलेका एक हजार सुविधासम्पन्न घरबासको कारोबार पनि शून्यमा झरेको छ।</p>
<p>लकडाउनले पर्यटकको आगमन नभएपछि अर्बौं लगानी गरेर सञ्चालनमा ल्याइएका बर्दिया, डल्लाका घरबास सञ्चालकहरू अहिले चिन्तित बनेको मधुवन नगरपालिका वडा नम्बर १ वडाध्यक्ष परशुराम थारुले बताए।</p>
<p>बर्दियाको बारबर्दिया नगरपालिका-९ को सत्खुलवा र ठाकुरबाबा नगरपालिका-५, गोविन्दपुरको घरबासको अवस्था पनि दयनीय बनेको छ।</p>
<p>बर्दिया मात्र हाेइन, बाँकेको गाभरमा रहेको घरवासको अवस्था पनि दयनीय भएको सञ्चालक कृष्ण चौधरीले बताए।</p>
<p>त्यसैगरी लकडाउनका कारण बर्दिया गुलरिया बजारका सानाठूला पसल, यातायात र होटल व्यवसायीले ठूलो घाटा भोग्नुपर्ने अवस्था सिर्जना भएको बर्दिया उद्योग वाणिज्य संघका अध्यक्ष विरु थारुले बताए। <em>रासस</em></p>
प्रतिक्रिया दिनुहोस्
.jpg)
