लकडाउनको १८ दिनसम्म तनहुँको गन्धर्व बस्तीमा पुगेन राहत
<p>तनहुँ। १८ दिनयताको लकडाउनका कारण भानु नगरपालिका-१ को गन्धर्व बस्तीमा खाद्य वस्तु अभाव हुन थालेको छ।</p>
<p>आर्थिक अवस्था कमजोर भएका यहाँका २५ घरपरिवार राहतको पर्खाइमा छन्।</p>
<p>सीता गन्धर्वले घरमा चुल्हो बल्न नसकेकाले रोगले भन्दा भोकले मरिने पो हो कि भन्ने चिन्ता थपिएको गुनासो गरिन्।</p>
<p>सारङ्गी रेटी गीत गाउँदै गाउँ, शहर र यात्रुबसमा डुलेर कमाएर खाने परिवार भएकाले खाद्यवस्तु जुटाउन समस्या परेको उनीहरूले बताएका छन्।</p>
<p>स्थानीयवासी शर्मिला गान्धारीले गन्धर्व बस्तीका सबै सुकुम्बासी रहेको बताउँदै भनिन्, ‘ठाउँठाउँमा राहत बाँडेको खबर सुनिएको छ तर हाम्रो बस्तीमा अझै आइपुगेको छैन ।’</p>
<p>दश वर्षका उमेरदेखि गीत गाएर परिवार पाल्दै आएका ५२ वर्षीय बुद्ध गन्धर्वले केहीले रेष्टुरेण्टमा गीत गाउने र सारङ्गी बजाउने गर्दै आएकोमा लकडाउनका कारण त्यो पनि बन्द भएपछि रोजिरोटी नै खोसिएको बताए। </p>
<p>भवानी गन्धर्व प्रश्न गर्छिन्, ‘हामी त आज ल्याएर आजै खाने हो, बच्चा भोक लाग्यो भन्छन्, के गर्ने ?’ </p>
<p>भानु नगरपालिकाका उपप्रमुख आशा थापाले राहतका लागि खाद्य सामग्री खरीद गर्ने प्रक्रियामा रहेकाले चाँडै राहत वितरण गरिने बताइन्।</p>
<p>उनका अनुसार अनुसार नगरपालिकाभर एक हजार ८२१ जनालाई राहत दिनुपर्ने सूची तयार भएको छ। <em>रासस</em></p>
प्रतिक्रिया दिनुहोस्
.jpg)
