वीरगन्जमा तीनजनामा कोरोना संक्रमण पुष्टि, नेपालमा संक्रमितको संख्या १२ पुग्यो
<p>काठमाडौं। स्वास्थ्य तथा जनसंख्या मन्त्रालयले वीरगन्जमा तीनजनामा कोरोना संक्रमण भएको पुष्टि गरेको छ। मन्त्रालयले आफ्नो फेसबुक पेजमार्फत् राष्ट्रिय जनस्वास्थ्य प्रयोगशालामा पुनः गरिएको परीक्षणमा तीनजनामा संक्रमण भएको पुष्टि गरेको हो। </p>
<p>पर्साको वीरगञ्‍ज महानगरपालिका २ छपकैयास्थित मस्जिदमा शंकास्पद रूपमा रहेका २१ जनाको परीक्षण गर्दा त्यसमध्ये तीन जनामा संक्रमण पुष्टि भएको हो। उनीहरू तीनैजना भारतीय नागरिक हुन्। </p>
<p>कोभिड-१९ को शंका लागेर नारायणी अस्पतालमा आइसोलेसनमा राखी निजहरूको समेत थ्रोट स्वाब किटजन्य रोग अनुसन्धान तथा तालिम केन्द्र, हेटौडाको ल्याबमा परीक्षण गरिएको थियो। उक्त परीक्षणमा २१ मध्ये शंकास्पद तीन जनाको पोजिटिभ देखिएपछि पुनः यकिन गर्न राष्ट्रिय जनस्वास्थ्य प्रयोगशालामा पठाइएको थियो।</p>
<p style="text-align:center"><img alt="" height="606" src="https://www.dekhapadhi.com/storage/photos/shares/COVID-19/Screen shot.png" width="850" /></p>
<p>उक्त मस्जिदमा बसिरहेका तीनजनामा कोरोना संक्रमण पुष्टि भएपछि त्यहाँ रहेका अन्य २६ जनालाई क्‍वारेन्टाइनमा राखिएको छ। </p>
<p>जिल्ला प्रहरी कार्यालय पर्साका प्रवक्ता डीएसपी वीरेन्द्र शाहीले मस्जिदमा रहेका भारतीय नागरिक र केही नेपालीसमेत गरेर २६ जनालाई क्‍वा‍रेन्टाइनमा राखिएको जानकारी दिए। वीरगञ्‍जस्थित सिद्धार्थ माविमा उनीहरूलाई राखिएको छ। “उनीहरू कहाँबाट र कहिलेदेखि आएका हुन् भन्‍ने विषयमा अनुसन्धान गरिरहेका छौं,” उनले भने, “तीनजनालाई आइसोलेसनमा राखिएपछि यहाँ सतर्कता अपनाइएको छ।”</p>
<p>उनीहरू सप्तरीमा आयोजित मुस्लिम धार्मिक सभामा सहभागी हुन आएको र यही बसिरहेको बताइएको छ। स्थानीय बासिन्दाले भने उनीहरू मस्जिदमा आएर बसेको दुई साता मात्रै भएको बताएका छन्। तीनजनालाई कोरोना संक्रमणको आशंकामा अस्पताल भर्ना गरिएपछि नारायणी क्षेत्रीय अस्पतालले इमर्जेन्सीबाहेकका अन्य सेवा बन्द गरेको छ।</p>
प्रतिक्रिया दिनुहोस्
.jpg)
