स्वास्थ्यमन्त्री ढकालले भने- औषधिमा आत्मनिर्भर हुनेगरी काम गरौँ
<p>काठमाडौं। स्वास्थ्य तथा जनसङ्ख्यामन्त्री भानुभक्त ढकालले अत्यावश्यक औषधिको उत्पादनमा नेपाल आत्मनिर्भर बन्ने गरी काम गर्नुपर्ने बताएका छन्। </p>
<p>देउराली जनता फर्मास्युटिकल्स् प्रालिका तर्फबाट आज प्राप्त एक लाख ५० हजार थान हाइड्रोक्सिक्लोरोक्वाइन सल्फेट ट्याब्लेट बुझ्दै मन्त्री ढकालले आगामी दिनमा औषधिमा आत्मनिर्भर हुन सकियोस् भन्नेर काम गर्नुपर्ने बताए।</p>
<p>“औषधिहरू पर्याप्त उत्पादन गर्न लाग्नुस्। उत्पादन गर्ने कुरामा कठिनाइ छन् भने ती कठिनाइ हटाउन सरकार तपाइँहरूको साथमा हुनेछ”, मन्त्री ढकालले भने। </p>
<p>प्रालिका कार्यकरी निर्देशक हरिभक्त शर्माले आफू सधैँ सरकारसँग हातेमालो गरेर अघि बढ्न तयार रहेको बताउँदै उद्योगका तर्फबाट आगामी दिनमा पनि सहयोग गर्दै जाने बताए। </p>
<p>हस्तान्तरण कार्यक्रममा मन्त्रालयका सचिव यादव कोइराला, मन्त्रालयका विज्ञ सल्लाहकार डा. खेमबहादुर कार्की र औषधि व्यवस्था विभागका महानिर्देशक नारायण ढकाल सहभागी थिए। <em>रासस</em></p>
प्रतिक्रिया दिनुहोस्
.jpg)
